Ньурба улууһугар Бүлүү өрүскэ Биллээх диэн сиргэ балаҕан ыйын 9 күнүгэр 15 чаас саҕана 1960 с.т. Тартыев Илья Афанасьевич сүппүтүн туһунан иһитиннэрии иллэрээ күн киэһэ 18 ч. 30 мүн. полицияҕа киирбитэ. Кини дьонун кытта Биллээххэ отоннуу, балыктыы тиийэн баран, дьиэ таһыгар отоннуу сылдьан сүппүт. Сэрэдэ киэһэ кинилэри Дьаархантан мотуоркалаах киһи тиийэн сылгылаан аҕалтыахтаах эбит. Бу иннинэ эрдэ кини инсультаан сылдьыбыт эбит. Сүппүт киһини көрдүүр үлэлэр бараллар.
Улуустааҕы олоҕу-дьаһаҕы хааччыйар сулууспа салайааччыта Афанасий Кириллин иһитиннэрэринэн, Биллээххэ миэстэтигэр 10 киһи сылдьар, ол иһигэр 2 киһи– Быыһыыр сулууспа үлэһиттэрэ, 1 участковай, 1 ыттаах кинолог уонна Тартыев аймахтара.
«Бу сарсыарда 5 — Антоновка олохтооҕо, 3 киһи – Ньурба куораттан уонна Дьаархантан 4 киһи буолан 3 мотуорунан Биллээххэ бараллар. Маартан эмиэ 4-5 киһи эбиллиэхтээх. Сүппүт киһини көрдүүр дьоҥҥо улуустан ГСМ бэрилиннэ», — диир Афанасий Кириллин.
Билигин күннэтэ ардыы турар, халлаан да ол быһыытынан түүнүн лаппа сөрүүн. Тартыев И.А. аймахтара баҕалаах дьону кинилэргэ көмөлөһөллөрүгэр көрдөһөллөр. Сүппүт киһи этэҥҥэ көһүннэр ханнык.
«Ньурба» хаһыат