Ньурбатааҕы техническэй лиссиэй выпускнига Дьулусхан Иванов , байыаннай параакка строевой хаамыыга кыттыыны ылан, ньурбаларга үтүө сонуну аҕалла. Соторутааҕыта Владивосток куоракка Арассыыйаҕа Муоратааҕы байыаннай флот күнэ бэлиэтэнэн ааспыта. Байыаннай параакка Арассыыйа Президенэ В.В.Путин кыттыыны ылбыта. Дьулусхан ньурбаларга үтүө сонуну аҕалла.
Ньурба куорат олохтоохторо, биэс оҕолоох Максим Васильевич, Виктория Семёновна Тыркаевтар дьиэ кэргэҥҥэ Дьулусхан ыал иккис оҕото буолар. Бу дьиэ кэргэҥҥэ тэҥ саастыы бырааттыылар Дьулусхан Владивостокка, Петр Уссурийскайга ВДВ-га ытык иэстэрин толорон сулууспалыы сылдьаллар.Иккиэн Ньурбатааҕы техническэй лиссиэйгэ үөрэммиттэр. Дьулусхан Дьокуускайдааҕы ХИФУ юридическай салаатын, Петр тыа хаһаайыстыбатын техникумун лесник үөрэҕин бүтэрбиттэр.
Дьулусхан Иванов Ньурбатааҕы техническэй лиссиэйгэ үөрэнэр кэмигэр «Искра» байыаннай-патриотическай, спортивнай кулуупка дьарыктанар. Салгыы «Искра» байыаннай-спортивнай кулууп туһунан санатан ааһыам.
2015 сыллаахха тэриллибит «Искра» байыаннай-патриотическай кулууп 2015-2018 үөрэх дьылларыгар Казань куоракка «Наследники победы» XV Бүтүн Арассыыйатааҕы ыччат байыаннай-спортивнайх тэрилтэлэрин кадетскай куорпустарын түмсүүтүн кыттыылаахтара. Татарстан Өрөспүүбүлүкэтигэр ыытыллыбыт уопсай хамаанданан күрэхтэһиигэ Арассыыйа 34 регионнарыттан 51 хамаандаттан 13 миэстэ, «Союз -2018» «Наследники Победы» култуурунай бырагыраама түмсүүтүн кыайыылааҕа. «Искра» БПК өрөспүүбүлүкэҕэ ыытыллыбыт икки төгүллээх байыаннай-спортивнай кулууп кыайыылааҕа, Владивосток куоракка ыытыллыбыт II-c Уһук Илиҥҥи байыаннай патриотическай кулууптар бэстибээллэрин «Никто кроме нас» холбоһуктаах түмсүүлэрин призердара буолаллар. Байыаннай саппаас старшай сержана «Надежда Якутии» бэлиэлээх физическэй култуураҕа үрдүк категориялаах учуутала Попов Игорь Михайлович салайааччынан күн бүгүҥҥэ диэри үлэлиир. Оҕолор манна эт-хаан өттүнэн сайдаллар, өй-санаа өттүнэн эбиллэллэр, спортивнай көрүҥнэргэ кытталлар.Спордунан дьарыктанар, байыаннай хайысханан барар оҕолор доруобуйалара тупсар, үөрэхтэригэр үчүгэйдик үөрэнэллэр.
— Биһиги уолбут Дьулусхан Ньурбатааҕы 3-дээх начаалынай оскуоланы бүтэрбитэ. Салгыы Ньурбатааҕы техническэй лиссиэйи ситиһиилээхтик бүтэрэн, Дьокуускайдааҕы ХИФУ юридическай салаа орто үөрэҕин бүтэрбитэ. Билигин Владивостокка ракетнай байыаннай сулууспаҕа сулууспалыыр, этэрээтигэр хамандыыр буоларын туһунан ийэтэ Виктория Семеновна кэпсэтиитин саҕалаата.
— Оҕобут Дьулусхан оскуолаҕа үөрэнэрин саҕаттан актыбыыс, элбэх ситиһиилэрдээх лиссиэйи бүтэрбитэ. Ол курдук өрөспүүбүлүкэтээҕи, оройуоннааҕы НПК-ҕа, «Инникигэ хардыы» НПК-ҕа ситиһиилээхтик кыттан, IV-I истиэпэннээх дипломант буолуталаабыта. Хаста даҕаны «Будущий дипломант -2018-2019» аатын иҥэрбиттэрэ.
Спорт өттүгэр кэккэ ситиһиилээх.Үөрэммит оскуолатыгар мас тардыһыытыгар, гиревой спорка оройуоннааҕы күрэхтэһиилэр кыайыылааҕа буолуталаабыта.
Ньурба куоратыгар ыытыллыбыт ойуулуур-дьүһүннүүр ускуустуба быыстапкатыгар тимири уһаныыга бастакы миэстэ, оройуоннааҕы «Отец.Отчество.Отечество» аҕалар кэмпириэнсийэлэригэр «Саха быһаҕа» үлэтинэн кыттыыны ылбыта.
Бу сылга 9 Маай уонна Арассыыйаҕа Муоратааҕы байыаннай флот параадыгар кытынна. «Бу сырыыга эмиэ Владивостокка параакка бэлэмнэнэ киирдибит», -диэн уолбут соһуччу кэпсиир идэлээх.
Түгэнинэн туһанан, Ньурбатааҕы техническэй лиссиэй «Искра» кулууп салайааччытыгар, үрдүкү категориялаах учууталбытыгар Попов Игорь Михайловичка биһиги дьиэ кэргэн аатыттан махталбын тиэрдэбин. Игорь Михайлович ыччаттары дойдуларын көмүскүүргэ патриотическай тыыҥҥа иитиитэ ыччаттар инники олохторун булуналларыгар үтүө холобур буолар, — диэн ийэ быһыытынан махталын биллэрдэ.
Антонина Семенова