Ньурба куорат киинигэр, 2 №-дээх орто оскуолаттан чугас Кузаков уулуссаҕа 83 кыбартыыралаах улахан дьиэ тутулла турара түннүктэрэ сандааран ыраахтан көстөр. Бу 3632 квадратнай миэтирэ иэннээх дьиэ бэдэрээтчитинэн Дьокуускайдааҕы “Саха Билд” ХЭТ буолар. Былырыын күһүн хойукка диэри тутааччылар дьиэ көҥдөйүн уонна сорох иһинээҕи үлэтин бүтэрбиттэрэ. Быйыл тутааччылар муус устар ыйтан саҕалаан үлэлии сылдьаллар. Үлэни-хамнаһы Ньурба Убайааныттан төрүттээх прораб Станислав Павлов иилээн-саҕалаан сүрүннүүр. 
«Мин Ньурбаҕа кулун тутар ыйга кэлбитим, — диэн кэпсиир кини. – Кыһыҥҥы суолунан тутуу матырыйаалбыт кэлбитин туппутум. Суол сабыллыан иннинэ матырыйаалбыт барыта кэриэтэ кэлбитэ. Муус устар ыйга эркини тутан таһаарааччылар уонна фасад оҥорооччулар кэлбиттэрэ. Бары күннээх Таджикистан дьоно. 10 киһи эркини тутан таһаарар, 5 киһи фасадка үлэлиир, итиэннэ 4 штукатурщик баар. Итини таһынан Дьокуускайтан саха уолаттара кэлэн түннүктэри туруоран бүтэн, баскыһыанньаҕа төнүннүлэр. Өссө кэлин эмиэ кэлиэхтээхтэр. 
Күн бүгүн үлэ 70%-нын кэриҥэ бүттэ диэххэ сөп. Былырыыҥыттан иккис уонна үһүс этээс штукатуркаланан уонна уота тардыллан бүттэ кэриэтэ. Билигин бэһис уонна бастакы этээс иһинээҕи эркиннэрин таһаарыы үлэтэ түмүктэннэҕинэ, Дьокуускайтан саха уолаттара электриктэр кэлэн уотун тардыахтара. Онтон штукатурка үлэтэ барыаҕа. Эмиэ Дьокуускайтан сантехник саха уолаттара кэлэн ититиитин уонна уутун ситимин тардыахтара. Бастакы этээскэ «сылаас муосталаах» буолар. Дьиэҕэ кыбартыыралар иэннэрэ ким хас хостооххо киирэриттэн тутулуктанан араастаһар. 1, 2, 3 уонна 4 хостоохтор бааллар. 
Үлэ график быһыытынан барар, дьөрү, өрөбүллэргэ даҕаны тохтообот. Эркини таһаарааччылар 7 ч. 30 мүн. кэлэн, киэһэ хойукка диэри үлэлииллэр. Мин сарсыарда 8 чааска кэлэбин, киэһэ 8 ч. диэри үлэ хаамыытын хонтуруоллуубун. Мэрияны кытта кэпсэтии түмүгэр, үлэһиттэрбитин олордорго Комсомольскай уул. элбэх кыбартыыралаах дьиэҕэ 2 квартираны биэрбитэ. Дьоммутун онно пропискалаан олохтообуппут.
Быйыл үлэбитин бүтэрэн балаҕан ыйыгар туттарыахтаахпыт. Итиэннэ манна таспытыгар эмиэ 83 кыбартыыралаах иккис дьиэ тутуутун саҕалыахпыт. Эмиэ бу бастакы дьиэ курдук «Г» моһуоннаах. Эһиил бүтэрэн үлэҕэ киллэрэргэ соруктанабыт».
Эмиэ быйыл Кузаков уул. 32 кыбартыыралаах дьиэни «Виком” ХЭТ үлэҕэ киллэриэхтээх. Дьиҥэ, былырыын киллэриэхтээҕин кыамматаҕа. Ааспыт ыйга Убайааҥҥа Манчаары уул. «Масстрой» ХЭТ 41 кыбартыыралаах дьиэ бастакы сыбаайатын түһэрбитэ, эһиил бүтэрэн үлэҕэ киллэриэхтээх.
Геннадий АНТОНОВ.