Кулун тутар 29 к. Ньурбаҕа Ил Түмэн Бэрэссэдээтэлин солбуйааччыта, сис кэмитиэт бэрэссэдээтэлэ Юрий Николаев Ил Түмэн бүддьүөккэ, үпкэ, нолуок уонна сыана бэлиитикэтигэр, бас билии уонна приватизация боппуруостарыгар сис кэмитиэтин көһө сылдьар сүбэ мунньаҕын салайан ыытта. Сүбэ мунньахха Ил Түмэн сис кэмитиэтин бэрэссэдээтэллэрэ Владимир Прокопьев, Георгий Балакшин, Светлана Давыдова, Александр Корякин уонна Андрей Николаев, СӨ Бырабыыталыстыбатын чилиэннэрэ, ыаллыы Бүлүү улуустарын дэлэгээссийэлэрэ, баһылыктар, дьокутааттар уонна тэрилтэлэр салайааччылара кытыннылар.
СӨ сыанаҕа бэлиитикэтин Госкомитетын бэрэссэдээтэлэ Николай Бочков, ОДьКХ уонна энергетика миниистирэ Вячеслав Емельянов, үп миниистирэ Валерий Жондоров, үп миниистирин солбуйааччыта Иван Елисеев дакылааттарын истэн дьүүллэһии ыытылынна. Видео-конференц сибээһинэн Дьокуускайтан уонна өрөспүүбүлүкэ улуустарыттан Ил Түмэн дьокутааттара уо.д.а. кэпсэтиигэ кытыннылар. Тутуу, үп-харчы, ОДьКХ, энергетика боппуруостара барыбытын даҕаны таарыйарын быһыытынан, салайааччыларга элбэх ыйытык киирдэ, сытыы кэпсэтии таҕыста.
Улуус баһылыга Алексей Иннокентьев улуус туруорсуулаах боппуруостарынан иһитиннэрии оҥорон кимиилээхтик кииристэ. Ньурба к. ичигэс сүүрэр манежтаах 300 миэстэлээх стадион тутуутугар үп бэриллиитин, балыыһа 2-с уочаратын тутуу сыаната лаппа үрдээбитинэн сибээстээн эбии үп көрүллэрин, гааһынан, уотунан уонна сылааһынан хааччыйыы сайдыытын учуоттаан өрөспүүбүлүкэ нэһилиэнньэлээх пууннарын зонированиетын категориятын бигэргэтэр туһунан СӨ Бырабыыталыстыбатын уурааҕар уларытыыны киллэрэн улуус нэһилиэнньэлээх пууннарын 3-с категорияҕа киллэрэри, нэһилиэктэр икки ардыларынааҕы суолларга өрөмүөн үлэтин СӨ Суол фондатын үбүлүүр туһунан туруоруста.
Ил Түмэн бүддьүөккэ сис кэмитиэтин көһө сылдьар мунньаҕын түмүгүнэн киирбит этиилэри учуоттаан уураах ылынна. СӨ Бырабыыталыстыбатыгар быйыл Ньурба к. сүүрэр манежтаах 3000 миэстэлээх стадион тутуутугар үп көрөрүгэр сүбэлииргэ; 2024 с. бэс ыйын 1 к. диэри Ньурба к. эмтиир куорпус тутуутугар эбии үбүлээһини көрөр боппуруоһу үөрэтэригэр, 2024 с. 2-с кыбаарталыгар «алмаастаах провинция» улуустарын кытта улуустар социальнай-экэнэмиичэскэй уонна экология өттүнэн сайдыыларын механизмын олоххо киллэрэргэ үлэлэһэргэ уураах ылылынна.
Былааннаммыттан быдан уһуннук уонна сэргэхтик барбыт Ил Түмэн сис кэмитиэтин сүбэ мунньаҕа наҕараадалары туттарыынан түмүктэннэ.
Мантан салгыы улуус дьаһалтатын мунньахтыыр саалатыгар Ил Түмэн дьокутааттара, СӨ Бырабыыталыстыбатын чилиэннэрэ уонна улуус дьаһалтата кыттыылаах сүбэ мунньах ыытылынна. Алексей Иннокентьев 2027 с. Ньурбаҕа СӨ норуоттарын 9-с Спортивнай оонньууларын көрсө тутуллуохтаах эбийиэктэри тутуу уонна үбүлээһин туһунан иһитиннэрии оҥордо. Спортивнай оонньуулар буолалларынан сибээстээн, Ньурба улууһун эбийиэктэрин приоритетнай быһыытынан көрөн үбүлээһин оҥоһулларыгар туруорсуу оҥоһулунна.
Улуус Сүбэтин бэрэссэдээтэлэ Нюргуяна Михайлова бүддьүөт тэрилтэлэригэр уонна тыа нэһилиэктэригэр эбии штаттары туруоруста. Элбэх тех-үлэһит аутсорсиҥҥа баран дуогабарынан кыра хамнаска үлэлииллэр, социальнай мэктиэлэрэ суох. Улуустарга ыччат исписэлиистэрин штатын өрөспүүбүлүкэ тутара наада. Улуус баһылыгын солбуйааччыта Наталия Петрова иһитиннэриитигэр оҕо сайыҥҥы сынньалаҥын, учуутал хамнаһын, улуустааҕы киин балыыһаны каадырынан хааччыйыы, медиктэргэ аналлаах уопсай дьиэ тутуутугар судаарыстыбаннай бырагыраама наадатын, нэһилиэктэри эминэн хааччыйыы боппуруостарын таарыйда.
Сиһилии улуус хаһыатын кэлэр №-гэр тахсыаҕа.
Геннадий Антонов