Бэс ыйын 17 күнүгэр, Марха (Ньурба) улууһа төрүттэммитэ 200 сылыгар аналлаах *»Удьуор утума»* Ньурба оройуонун Үрүҥ Тунах Ыһыаҕын үөрүүлээх аһыллыыта буолла. Ыһыах аһыллыытын сиэрэ-туома ыраахтан-чугастан ыҥырыллан кэлбит ытык-мааны ыалдьыттары билиһиннэрииттэн саҕаланна. Үгэс быһыытынан сирбитин-уоппутун сыт таһааран арчылаан, Ыһыах Алгысчытын көрсөн, Айыылардыын алтыһар үтүө түгэммит тосхойдо.
Марха улууһа төрүттэммитэ үбүлүөйдээх сылын көрсө, улууспут устуоруйатыттан быһа тардан көрдөрөр туруоруу дьон-сэргэ биһирэбилин ылла. Түмүккэ 200 дьахтар үрүҥ чөмчүүк мөлбө чорооннору күөрэччи тутан, үрүҥ илгэ үҥкүүтүнэн уруйдаатылар-айхаллаатылар. Ыһыах аһыллыытыгар Марха улууһа Үөһээ Бүлүү улууһуттан арахсан, туһунан улуус буолбут дириҥ устуоруйатын режиссер, Саха Өрөспүүбүлүкэтин ускуустубатын үтүөлээх диэйэтэлэ *Александр Васильевич Титигиров* туруорда. Режиссер көрүүтүн АГИКИ профессора, педагогика билимин кандидата *Евдокия Степановна Сергина* сценарийга түмэн, биир ураты, Ньурбалыы киэҥ далааһыннаах, ис хоһоонноох, суолталаах туруорууну бэлэхтээтилэр.
Быйылгы үбүлүөйдээх ыһыахпытыгар *СӨ бас-көс дьоно, норуот дьокутааттара, Чурапчы, Хаҥалас, Сунтаар, Горнай, Үөһээ Бүлүү* улуустарыттан делегациялар, ону тэҥэ, ыраах *Казахстан, Кыргызстан, Монголия, Франция* сирдэриттэн төрүт үгэстэринэн дьарыктанар, чинчийэр, толорор ыалдьыттар кыттыыны ылаллар. Дьокуускай куораттан *Арктикатааҕы судаарыстыбаннай култуура уонна ускуустуба институтун, СӨ национальнай библиотекатын, «Айар» национальнай кинигэ кыһатын, СӨ интеллектуальнай история уонна култуура киинин, «Биир ньыгыл Арассыыйа» бэлитиическэй баартыйатын, Саха көрдөрөр-иһитиннэрэр хампаанньатын* бөлөхтөрө улахан тэрээһини көрө-истэ, үөрэтэ, тэрийсэ, үлэлэһэ, ыалдьыттыы кэлбиттэригэр ис сүрэхпититтэн махтанабыт.
Ыалдьыттарбыт Ыһыах аһыллыытын сиэрин-туомун, туруоруутун сэргээтилэр, астыннылар, киэн тутуннулар, махталларын биллэрдилэр. Ыалдьыттарбытын ыһыах араас түһүлгэлэригэр көрсөбүт, сарсын норуоттар икки ардыларынааҕы Кымыс иһиитин сиэрин-туомун көрөн, сөҕүөхпүт-махтайыахпыт турдаҕа.
Улуустааҕы Култуура департамена
Хаартыскаҕа Александр Гаврильев түһэриитэ