Аҕа дойдуну көмүскээччи күнүгэр анаан Ньурбачааҥҥа сэттэ түһүмэхтээх оҕо, аҕа, эһээ күрэҕэ ыытылынна. Саас чугаһаан аһаҕас халлаан анныгар улууска арааһа биир бастакы тэрээһин буолуо.
Күрэх аһылллыытын алгысчыт, Ньурба оройуонун мааны киһитэ Алиса Михайловна Иннокентьева Айыылартан көҥүллэтэн, алгыс түһэрэн арыйда.
Олохтоох уһуйаан эдэркээн иитээччилэрэ, «Сүүтүк» түмсүү иистэнньэннэрэ курэх аһыллыытын киэргэттилэр.
Курэх бастакы түһүмэҕэр кыттааччылар эстафетаҕа күрэхтэстилэр. Манна өҥөлдьөлөр кыайдылар. Сыал ытыыга Күндээдэ хамаандата бастаата. Үһүс түһүмэххэ ойбон алларыыга түргэн-тарҕан туттуулаах өҥөлдьөлөр бастаатылар. Хамаандалар мас эрбээн, хайытан, чэй оргутарга күрэхтэстилэр. Түмүктүүр түһүмэҕинэн хапсаҕай буолла. Хапсаҕайга РИК «Автодор» хамаандата бастаата. Күрэх быыһыгар Ньурбачаан оҕолоро ырыа ыллаан дьону сэргэхситтилэр, хорчуоппа үлэлээтэ. Күрэх түмүгүнэн кыайыылааҕынан Өҥөлдьө хамаандата буолла. Кинилэргэ сүрүн бириис — убаһа тигистэ. Бириис спонсора — Ньурбачаан олохтооҕо, ветеринар идэлээх Николаев Василий Николаевич буолла. Иккис миэстэҕэ — күндээдэлэр буоллулар. Кинилэр Ньурбачаан нэһилиэгин олохтоох дьокутаттара туруорбут бириистэрин -тэлэбиисэринэн наҕараадаланнылар. Үһүс миэстэҕэ Ньурбачаантан Угапьевтар дьиэ кэргэн тигистилэр. Кинилэр инструмент наборунан наҕараадаланнылар. Бириис спонсора- Ньурбачаан нэһилиэгин «Сайдыы» уһуйаан коллектива ( сэбиэдиссэй Семенова А.В.) Анал бирииһинэн РИК «Автодор» хамаандата бэлиэтэннэ.Бириис спонсора — олохтоох оскуола коллектива, директор Никитина А.Е.).
Күрэх түмүгэр нэһилиэк баһылыга Герасимов Артем Атаманович тус көҕүлээһининэн «Буран-шоу» буолла. Манна 5 бураннаах эр бэртэрэ кыттыыны ыллылар. Кыайыылаах суурдээччи Николаев Павел Семенович баһылык Герасимов Артем Атаманович туруорбут бирииһинэн — 100 ботуруонунан наҕараадаланна. Бу курдук оройуоҥҥа бастакынан ыытыллыбыт «Эһээм, аҕам уонна мин » күрэх үтүө үгэскэ кубулуйан Ньурбачааҥҥа ыытылла турарыгар эрэнэбит. Курэххэ кэлэн кыттыыны ылбыт бары кыттааччыларга, күрэҕи кэлэн көрбүт бар дьоммутугар махталбытын тиэрдэбит.
🦅 Дьоһун туттуулаах-хаптыылаах, элбэх оҕолоох Ньурбачаан ыччата кыттыыны ылла. 35 саастаах Григорий Угапьев үс уол, икки кыыс аҕата. ЖКХ-ҕа үлэлиир. Кырата иккилээх, 14-тээх улаханынаан, аҕатынаан күрэххэ кытта сылдьаллар. Маннык тэрээһиҥҥэ бастакы кыттыылара эбит.
Дьонноругар ыалдьа Угапьевтар тэрээһиҥҥэ толору дьиэ кэргэнинэн кэлбиттэр. Григорий күрэҕи сэҥээрэн бырааһынньыкка холоото. Өҥөлдьөлөр кыайаннар убаһаҕа тигистилэр, иккис Күндээдэ, Угапьевтар үһүс. Маны тэҥэ сэргэх күнү түмүктээн бурааннар куоталастылар. Нэһилиэк баһылыга Артем Герасимов олохтоохтору көҕүлээн 100 ботуруон туруорда.
👏🏼 Дьиэ кэргэни түмэр, сатабылы, төрүт дьарыгы кэлэр көлүөнэҕэ тиэрдэр күрэххэ ыччат көхтөөҕө үөрдэр. Онуоха олохтоох, Ньурбачаан нэһилиэгин главнай ветеринара Василий Николаев сүрүн бириис быһыытынан убаһатын туруорбута сөхтөрдө.
Ньурбачааннааҕы пресс-сулууспа