Ахсынньы 11 күнүгэр Дьокуускай куоракка буолбут «Ситиһии баала. Сыл түмүктэрэ» диэн өрөспүүбүлүкэтээҕи көрбөттөр сообществоларын түмүктүүр тэрээһиҥҥэ Ньурба улууһун көрбөттөр обществолара 2025 сыл түмүгүнэн бастыҥ общество аатын ылан, 25 тыһыынча солкуобайдаах сертификатынан наҕараадаланна!
Бу үөрүүлээх сонун Ньурбабыт киэн туттуута буолар!
Ньурбатааҕы көрбөттөр обществоларыгар 100-тэн тахса киһи чилиэнинэн сылдьар. Салайааччылара, ытыктабыллаах Светлана Семеновна Яковлева иһитиннэрбитинэн, бу ситиһии төрүтэ маннык: «Быйыл буолбут туох баар өрөспүүбүлүкэ үрдүнэн ыытыллыбыт чөмпүйэнээттэргэ ситиһиилээхтик кыттан, хабылыкка, хаамыскаҕа, голболга, шоудаҥҥа, үбүлүөйүнай ыһыах күрэхтэһиилэригэр барытыгар миэстэлэһэн, призердар ахсааннарыгар киирдибит. Ону таһынан, бэйэбит Ньурбаҕа 30-ча араас тэрээһини ыыппыппыт биһигини итинник үрдүк наҕараадаҕа тириэрдэн, үрдүктүк сыаналанныбыт».
Улуус дьаһалтатын аатыттан Ньурбатааҕы көрбөттөр обществоларын салайааччытыгар Светлана Семеновнаҕа уонна бу барытын ситиспит общество чилиэннэригэр барыгытыгар итии-истиҥ эҕэрдэбитин тиэрдэбит! Инникитин даҕаны өссө элбэх ситиһиилэри, күүстээх санааны, көхтөөх, дьоһуннаах олоҕу баҕарабыт! Саха сирин үрдүнэн сырдык сулус буолан, куруутун сырдаан, өссө үрдүк чыпчааллары дабайыҥ!
Ньурба улууһун дьаһалтатын пресс-сулууспата