Бүгүн Ньурбатааҕы техникум базатыгар Маарга саҥа икки мастерской: гааһынан хааччыйыы оборудованиетын уонна систиэмэтин, маны тэҥэ массыына өрөмүөнүн мастерскойдарын үөрүүлээх арыллыыта буолла.
Устудьуоннар бэлэм уопуттаах үлэһит буолан тахсалларыгар бары усулуобуйа олохтонно, оборудование барыта баар буолла. Бу мастерскойдар Россия Минвостокразвития субсидиятын көмөтүнэн олоххо киирдилэр.
Үөрүүлээх тэрээһиҥҥэ Ньурба оройуонун баһылыгын бастакы солбуйааччыта Василий Семенов, Ньурба куорат баһылыгын солбуйааччыта Павел Необутов, үөрэх управлениетын салайааччыта Федор Ушканов, Түмүк нэһилиэгин баһылыга Дмитрий Егоров, Дьарыктаах буолуу киинин салайааччыта Сахая Столярова кыттыыны ыллылар.
Техникум дириэктэрэ Андрей Федоров:
Бу улахан үлэ муус устарга саҕаламмыта уонна бүгүн бу үөрүүлээх арыллыыта буолбутунан үөрэн-көтөн турабыт. Биһиэхэ 140 устудьуон 5 хайысханан үөрэнэ сылдьар. Промышленность уонна тыа хаһаайыстыбатын эйгэтигэр тута үлэлииргэ бэлэм каадырдары иитэн таһаарарга үлэлэһэбит. Саҥа кэлбит оборудованиеларбыт, массыыналар биһиги тэрилтэбит инники сайдыытыгар, наадалаах каадырдары бэлэмниирбитигэр улахан төһүү күүс буолуохтара. Өссө даҕаны граннарга кыттыахпыт, мастерскойдарбытын элбэтэргэ үлэлэһиэхпит.
Үөрүүлээх тэрээһиҥҥэ СӨ үөрэх уонна наука миниистирин бастакы солбуйааччыта Михаил Юрьевич Присяжный быһа сибээһинэн холбонон кыттыыны ылла. Кини техникум кэлэктиибин улахан үлэ түмүмктэммитинэн уонна саҕаламмытынан эҕэрдэлээтэ. Кыах баар буолла даҕаны тута Маарга кэлэн мастерскойдар хайдах тэринэн үлэлии туралларын көрүөм диэн эрэннэрдэ.
СӨ Ил Түмэн народнай депутаттара Владимир Михайлович Прокопьев, Георгий Русланович Балакшин эҕэрдэлээтилэр. Бу улахан үлэ биһиги депутаттарбыт быһаччы көмөлөрүнэн уонна өйөбүллэринэн олоххо киирдэ.
Василий Терентьевич Трофимов, 40 тахса сыл техникумҥа преподавателинэн үлэлээбит
— Биһиги үлэлиирбит саҕана маннык саҥа тэриллэр суох этилэр, слесарнай дьыала уонна массыына өрөмүөнэ диэни үөрэтэр этибит. Билигин бу баҕа санаабыт туолбутугар олус үөрэн олоробут. Билигин араас оборудование баар буолан, биһиги устудьуоннарбыт, оҕолорбут кэми кытары тэҥҥэ сайдаллар. Оҕолорбут билиилэрэ-көрүүлэрэ кэҥиэ, сайдыылаах үчүгэй үлэһиттэр буолан тахсыахтара диэн эрэнэбит.
Үөһээ Бүлүү техникумуттан старшай маастар Роман Харахов, преподавателлэр Альберт Ильин, Павел Васильев:
— Суолбут куһаҕан буолан кыратык хойутаан кэллибит. Наһаа үчүгэй мастерскойдар арыллыбыттар эбит. Газовиктар диэн билиҥҥи кэмҥэ олус наадалаах дьон. Биһиги Ньурбатааҕы техникуму кытары наар ситимнээхтик үлэлиибит, эксээмэннэргэ хардарыта сылдьыһан экспертиибит. Кэллиэгэлэрбитин улахан үлэҕитинэн ис сүрэхпититтэн эҕэрдэлиибит.
Үөрүүлээх тэрээһин техникумҥа 20-тэн тахса сыл үлэлээбит бэтэрээннэри чиэстээһининэн, бастыҥ үлэһиттэри наҕараадалааһынынан түмүктэннэ.
Лена Петрова