Алтынньы 18 күнүгэр Степан Васильев аатынан Ньурба элбэх хайысхалаах гимназиятын 8 “а” кылааһын уолаттара аҕаларын кытта ИП «Васильев А.И.» тэрилтэлэрин кэрийэн көрдүлэр.
Бу экскурсия Аҕа күнүгэр ананна. Альберт Иванович бастаан халбаһы оҥорор сыаҕын көрдөрдө, манна оҕолор сыах үлэтин, халбаһы хайдах астанан маҕаһыыннарга атыыга тиийэрин сиһилии биллилэр. Халбаһы амсайан үөрүүлэрэ үгүс буолла. Онтон Дьаархаҥҥа тиийэн Альберт Иванович сыһыыга үлэни, хотоҥҥо ынахтар хайдах туралларын, аһыылларын, ыаналларын көрдөрдө. Оҕолор сүөгэй оҥоһуллар оборудованиетын, үлэһиттэр олорор сирдэрин, буойуна үлэтин көрдүлэр-иһиттилэр. Онтон Альберт Иванович кэргэнэ Валентина Николаевналыын уонна улэһиттэриниин оҕолорго бириистээх оонньуу оонньоттулар. Воздушканан ытыыга, оскуома саайарга Степанов Валентин уонна Яковлев Айсен бастаан, иккилии халбаһы тутан үөрдүлэр-көттүлэр.
Ол кэннэ пилорама үлэтин билистибит, маһы хантан аҕалан, хайдах араас дьүһүннээх хаптаһын уонна буруус буоларын сэргии иһиттибит. Ити курдук туруу улэһит дьон Альберт Иванович уонна Валентина Николаевна аныгы уйэҕэ тэҥҥэ хаамсан үлэлии-хамсыы сылдьалларын сөхтүбүт-махтайдыбыт. Бу курдук бэйэбит сирбитигэр сибиэһэй аһынан хааччыйан олохтоох дьон махталын ылан, дьон тоҕуоруйан бэйэ халбаһытын, үүт аһын ыла турдун диэн баҕарыа этибит. Оҕолорго үтүө күнү бэлэхтээбиттэригэр махтанабыт, инникитин да кэлэр кэнчээри ыччакка бэйэлэрин уопуттарыттан кэпсээн, ситиһиилээх үлэлэринэн Ньурбабыт сирин аатырда турдуннар!
8 “а” кылаас төрөппүттэрэ, кылаас салайааччыта Захарова Марина Дмитриевна