Бүгүн ОДьКХ уонна энергетика миниистирэ Вячеслав Емельянов кыттыылаах сүбэ мунньах буолла.
Бу туһунан улуус баһылыга Алексей Михайлович Иннокентьев бэйэтин Телеграмыгар суруйар.
«Улуус Сүбэтин бэрэссэдээтэлэ Нюргуяна Михайлова, мин солбуйааччыларым Василий Семенов, Константин Иванов, Валерия Владимирова, сылааһынан хааччыйар тэрилтэлэр, Кировтааҕы чох разреһын салайааччылара, Ньурба куорат баһылыга Геннадий Игнатьев, нэһилиэктэр баһылыктара уо.д.а. кытыннылар.
ОДьКХ тэрилтэлэрин кыһалҕаларын, чуолаан өрөспүүбүлүкэттэн субсидия олус хойутаан кэлиитин, кэлэр оттук сезонугар бэлэмнэнии үлэтин, нэһилиэктэргэ СВО кыттыылаахтарын дьиэлэрин уонна Ньурбаҕа СӨ норуоттарын IX Спортивнай оонньууларыгар тутуллар эбийиэги кииннэммит сылааска холбооһун туһунан кэпсэттибит. Туһааннаах салайааччылар миниистиргэ туруорсууларын тиэртилэр.
Вячеслав Павлович субсидия ылар иэстээх улууспут тэрилтэлэрэ приоритетнай испииһэккэ баалларын, чуолаан ордук уустук балаһыанньалаах «Кыым» ХЭТ уонна «Клин-сити» ХЭТ өрөспүүбүлүкэ 168 тэрилтэтиттэн реестргэ 5 иһигэр сылдьалларын, үп кэллэ даҕаны тута ыытыахтарын иһитиннэрдэ. Чааһынай секторы кииннэммит сылааска холбуурга олох бобуу суоҕун, тэхиниичэскэй өттүнэн кыаллар буоллаҕына уонна улуустан утары хамсааһын, үбүлээһин баар буоллаҕына холбуулларын эттэ. Манна приоритет быһыытынан СВО кыттыылаахтарын дьиэ кэргэттэрэ буолаллар.
Вячеслав Павловичка биһиги туруорсууларбытын өйүүрүн, улууспутун кытта биир ситимнээх үлэтин иһин истиҥник махтанан туран, Ньурба улууһун туһунан саҥа кинигэни бэлэх туттардым.
Сүбэ мунньах бэлиэ түгэнинэн СӨ ОДьКХ уонна энергетика миниистирэ Вячеслав Емяльянов «ОДьКХ» ГУП Ньурбатааҕы филиалын хоһуун үлэһиттэригэр уонна ОДьКХ сайдыытыгар күүскэ үлэлэһэр дьоҥҥо истиҥник махтанан туран, наҕараадалары туттарыыта буолла.
Саҥа дьыллааҕы уһун өрөбүллэргэ Эдьигээн улууһугар улахан саахал тахсан, Ньурбаттан ГУП филиалын кылаабынай инженерэ Антон Костин салалтатынан түүннэри 8 киһи баран, бириэмэни аахсыбакка үлэлээн, Эдьигээн квартальнай хочуолунайын чөлүгэр түһэрсибиттэрэ.
ОДьКХ тутаах үлэһиттэрэ Антон Костин, Василий Андреев, Григорий Николаев, Виталий Кюдяков, Семен Куртуяхов, Аркадий Александров, Аял Сидоров, Василий Яковлев ОДьКХ уонна энергетика министиэристибэтин Бочуотунай грамотатынан наҕараадаланнылар. Итини сэргэ ИСУ исписэлииһэ Людмила Васильева министиэристибэ Бочуотунай грамотатынан, сууккаҕа 1200 кубометр ууну хостоон ыраастыыр ыстаансыйаны туппут бэдэрээтчит – «Сибтрансстрой» ХЭТ гендириэктэрэ Владислав Петров, ИСУ салайааччыта Константин Иванов «ОДьКХ уонна энергетика сайдыытыгар кылаатын иһин» знагынан бэлиэтэннилэр. ОДьКХ эйгэтигэр мин үлэм эмиэ сыаналаммытын иһин Вячеслав Павловичка махтанабын!
ОДьКХ уонна энергетика миниистирэ Вячеслав Емельяновы, улуус баһылыгын бастакы солбуйааччыта Василий Семеновы уонна Ньурба куорат баһылыга Геннадий Игнатьевы кытта, СӨ Бырабыыталыстыбатын Бэрэссэдээтэлин бастакы солбуйааччыта Дмитрий Садовников видеоконференц-сибээһинэн ыыппыт сүбэ мунньаҕар кытынныбыт.
Сылааһынан хааччыйар эбийиэктэри, олорор дьиэлэри уонна социальнай эбийиэктэри кэлэр кыстык сезонугар бэлэмнээһин боппуруостара көрүлүннэ. Дмитрий Дмитриевич уонна Үөһээ Халыма, Хаҥалас, Усуйаана, Өймөкөөн, Булуҥ улуустарын баһылыктарын иһитиннэриилэрин иһиттибит.
Дмитрий Садовников өрөмүөн үлэтин кэмигэр бүтэрэн, кыстыкка бэлэмнээх буолуу пааспардарын хойутаабакка ылан кыстыкка толору бэлэмнээх киирэргэ сыал-сорук туруорда. Туһааннаах салайааччыларга чопчу сорудахтар тиэрдилиннилэр.
Улуус дьаһалтатын пресс-сулууспата