«Ысыах Олонхо в Нерюнгринском районе: от эпосов к диалогу культур» диэн регионнар икки ардыларынааҕы научнай-методическай конференцияҕа Ньурба оройуонуттан Култуура департаменын салайааччытын айар үлэҕэ солбуйааччыта Д.И. Бурнашева уонна К.Д. Уткин аатынан норуоттар доҕордоһууларын түмэлин дириэктэрэ А.А. Туманова кыттыыны ыллылар.
Икки күннээх, дириҥ ис хоһоонноох тэрээһин 2рөспүүбүлүкэ араас муннуктарыттан үгүс киһини үмүөрүттэ, аны сайын Нерюнгри сиригэр-уотугар ыытыллар Олоҥхо ыһыаҕын аартыктарын арыйда.
Маҥнайгы күнүгэр Иенгра эбэҥки төрүт нэһилиэгэр ыалдьыттаан, олохтоох төрүт омуктары кытары алтыһан, элбэх сонун арыйыылары хас биирдии ыалдьыт бэйэтигэр арынна. Иккис күнүгэр секцияларынан арахсан, конференция хаамыытынан дакылааттары иһиттилэр.
Дора Илларионовна Ньурба оройуонун култуураҕа ситимэ былыргыттан утумнанан-ситимнэнэн күн бүгүҥҥэ диэри ыытар үлэбитин сырдатар «Ньурба олоҥхото: үгэс, ситим, кэскил» диэн тиэмэни билсиһиннэрдэ, дьон-сэргэ кэрэхсэбилин ылла.
Олоҥхо ыһыаҕын иннигэр ыытыллар научнай-методическай конференция үгэскэ кубулуйуута норуоппут, талааммыт, сатабылбыт сайдарыгар, кэнчээри ыччакка тиийэригэр, киэҥ араҥаҕа биллэригэр-көстөрүгэр төһүү күүс буолар.
Ньурба култуурата