Алтынньы 19 күнүгэр Урбаан, атыы уонна олохтоох оҥорон таһаарыы департаменыгар «Поколение бизнес” диэн республикатааҕы олимпиада оройуоннааҕы түһүмэҕэ ыытылынна. Бу иннинэ 14-18 диэри саастаах оскуола оҕолорун урбаан эйгэтигэр сыһыарар сыаллаах күрэххэ 8 оҕо сайаапкатын, видеотын оҥорон ыытта. Оҕо оҥорон таһаарар дьоҕурун сайыннаран ханнык баҕарар тиэмэҕэ бизнес-бырайыак толкуйдаан, онтун билиһиннэрии быһыытынан оҥорбуттара.
Олимпиадаҕа барыта 8 үөрэнээччи Маалыкай, Хатыы, Маар, Хорула оскуолаларыттан кытынна. Ол курдук, мастан сувенирдары, кытыантан мыыла, чүмэчи оҥорон атыылааһын, рассада олордуута, бырааһынньыктары тэрийиигэ үлэлэһии курдук бырайыактар киирбиттэр.
Оҕолор үлэлэрин 5 киһиттэн турар састааптаах дьүүллүүр сүбэ сыаналаата. Хамыыһыйа бэрэссэдээтэлэ Егоров Сергей Юрьевич, “Мой бизнес” киин Ньурбатааҕы салаатын сэбиэдиссэйэ, Яковлева Диана Дмитриевна, үөрэх управлениетын исписэлииһэ, Николаева Наталья Афанасьевна, урбаан, атыы уонна олохтоох оҥорон таһаарыы департаменын бырайыактарын менеджерэ, Андреева Людмила Николаевна, урбаанньыт уонна “Ньурба-Огни Нюрбы” хаһыаттан мин, Петрова Лена Ивановна үлэлээтибит.
Урбаан өттүгэр саҥа саҕалааһыннары, бастакы хардыылары өйүүргэ инникилээх олимпиадаҕа аҕыйах оҕо кыттыбыта хомолтолоох. Кыайыылаахтарга бэйэлэрин дьоҕус дьыалаларын арынан үлэлэтэллэригэр 300.000 солк. бириис фондатыттан көмө харчы бэриллэр эбит. Оскуола оҕотугар бу олус үчүгэй өйөбүл диэн сыаналыыбын.
Анал критерийдэринэн сыаналааһын түмүгэр 3 оҕо салгыы республика таһымыгар кытта барыахтара. Ол курдук, Маалыкай орто оскуолатыттан Васильева Айыллаана Куо “АЙКУО” диэн бэйэтэ тус бренд оҥостубутун билиһиннэрдэ. Билигин кини тэтэрээттэргэ, оскуолаҕа туттар тэрилгэ анал ойуулары түһэрэр, оҥорор эбит буоллаҕына, инникиктин мантын сайыннаран таҥаска-сапка брендированнай ойуу түһэрэринэн дьарыктанар санаалаах эбит.
Хорула орто оскуолатын үөрэнээччитэ Михайлов Антон араас улахан, кыра тэрээһиннэргэ оҕолорго гипоаллергеннай аквагрим уруһуйдуура биһирэннэ. Кини мантын салгыы сайыннарар сыаллаах.
Маалыкай орто оскуолатын үөрэнээччитэ Андреев Сайаан кылааһын оҕолорун кытта биир сыллаах рассада олордон нэһилиэнньэҕэ удамыр сыанаҕа атыылыыллара биһирэннэ. Сиэмэтин талыыттан саҕалаан, оскуолаҕа олордон, көрөн-харайан баран, кэмэ кэллэҕинэ атыыга таһаараллар эбит.
Бу оҕолор салгыы бырайыактарын чочуйан, республикаҕа кытта баралларыгар путевка ыллылар. Кэлэр түһүмэҕи аастахтарына урбаан кистэлэҥнэригэр, бизнес-былааннары оҥорорго үөрэниэхтэрэ. Кыайыылаахтар, финалга киирбит оҕолор Дьокуускайга баран экспердэр иннилэригэр бырайыактарын көмүскүөхтэрэ. Кинилэргэ ситиһиилэри баҕарабыт!
Лена Петрова