Ытыктабыллаах Ньурба улууһун олохтоохторо!
Балаҕан ыйын 27 күнэ Саха Өрөспүүбүлүкэтин историятыгар Өрөспүүбүлүкэ билиҥҥи уонна инники сайдыытын суолун саҥа форматын, кини кэскилигэр, демократическай федеративнай Арассыыйа субъега быһыытынан бөҕө акылааты уурбут тутаах быһаарыныы күнүн быһыытынан киирбитэ.
1990-с сылларга историческэй кэм сүрүн кэрдиистэринэн «Судаарыстыбаннай суверенитет туһунан Декларацияны» ылыныы, президентство институтун судаарыстыбаннай былаас тиһигэр киллэрии уонна СӨ саҥа Конституциятын (Сүрүн сокуонун) ылыныы, СӨ Судаарыстыбаннай Мунньаҕын (Ил Түмэн) тэрийии, Федеративнай дуогабар, Российскай Федерация былааһын уонна СӨ государственнай былаастарын органнарын икки ардыларыгар салайыы предметтэрин уонна боломуочуйаларын араарыы туһунан дуогабар курдук суолталаах докумуоннарга илии баттааһын буолар.
Өрөспүүбүлүкэ судаарыстыбаннаһа Российскай Федерация састаабыгар субъект быһыытынан Саха сирин элбэх омуктаах норуота бэйэтин дьылҕатын бэйэтэ быһаарар быраабын уонна кыаҕын бигэргэппитэ.
Бүгүн Саха сирэ элбэх омуктаах Арассыыйа судаарыстыбатын биир саамай кэрэхсэбиллээх, кэскиллээх субъега. Биһиги ураты киэҥ сирбитинэн, айылҕа дьикти кэрэтинэн уонна бииргэ түмсүүбүт төрүтүн тутар норуоттарбыт баай култуурунай нэһилиэстибэлэринэн киэн туттабыт.
Саха Өрөспүүбүлүкэтин судаарыстыбаннаһын күнүгэр дойдубут чэчирии сайдарыгар бигэ акылааты уурбут, Өрөспүүбүлүкэни төрүттээбит Алексей Елисеевич Кулаковскайга, Платон Алексеевич Ойуунускайга, Максим Кирович Аммосовка, Степан Максимович Аржаковка, Исидор Никифорович Бараховка, Степан Васильевич Васильевка уонна кинилэри кытта бииргэ үлэлэспит дьоҥҥо сүгүрүйэбит.
ХХ үйэҕэ Саха сирин салайбыт сэбиэскэй, онтон кэлин кэмнэргэ: ЯЦИК бэрэссэдээтэллэрин, ССКП обкомун сэкирэтээрдэрин, Саха АССР Үрдүкү Сэбиэтин президиумун, Совнаркомун бэрэссэдээтэллэрин, министирдэр сэбиэттэрин, СӨ Президеннэрин, Государственнай Мунньаҕын (Ил Түмэн) салайааччыларын, СӨ бырабыытылыстыбатын бэрэссэдээтэллэрин саха судаарыстыбаннаһа төрүттэнэригэр олук буолбуттарыгар ытыктабылбыт муҥура суох.
Экономикаҕа уонна култуураҕа бүгүҥҥү ситиһиилэрбит биһиги элбэх омуктаах өрөспүүбүлүкэбит бүтүн норуотун үлэтин түмүгэ буоларын тоһоҕолоон бэлиэтиэххэ наада. Бу бырааһынньык күнүгэр бэйэлэрин үлэлэринэн-хамнастарынан, талааннарынан төрөөбүт сирбит чэчирии сайдарыгар сыаната суох кылаатын киллэрбит дьоҥҥо барыларыгар махтанабыт.
Биһиги, саха дьоно, бу уустук быһыы-майгы кэмигэр, Өрөспүүбүлүкэбит инники сайдыытыгар, судаарыстыбаннаһа өссө да бөҕөргүүрүгэр, олохпут таһыма үрдүүрүгэр инникигэ эрэлбит улахан.
Барыгытыгар доруобуйаны уонна дьолу-соргуну, эйэни, бары дьыалаҕытыгар табыллыыны уонна ситиһиилэри баҕарабыт!
Норуот дьокутааттара Г.Р. Балакшин, В.М. Прокопьев