Судаарыстыбаннай уонна уопсастыбаннай диэйэтэл, бочуоттаах мировой судьуйа, меценат уонна попечитель, төрүт удьуор бочуоттаах гражданин, Бүлүү уокуругун Марха улууһун Бэстээх нэһилиэгин бочуоттаах инородеһа, Марха улууһун баһылыга, Чаппанда церковнай-приходской оскуолатын маҥнайгы попечителэ Степан Прокопьевич — Боһуут аатын, оскуола ол кэмҥэ дириэктэрэ Ефимов А. Н. туруорсуутунан 2006 сыл муус устар 5 күнүгэр СӨ президенэ В.А.Штыров ыйааҕынан Чаппанда орто оскуолатыгар үтүө аатын үйэтитэр сыалтан уонна Саха сиригэр социальнай-экономическай сайдыытыгар киллэрбит улахан үтүөлэрин учуоттаан, Ньурба оройуонун Чаппанда анал орто үөрэҕин кыһатыгар Алексеев Степан Прокопьевич-Боһуут аатын иҥэрэргэ ыйааҕа тахсыбыта.
Ол онтон ыла, 2006 сылтан Боһуут хос сиэннэрэ Алексеевтар Чаппанда орто оскуолатыгар ситимнэрин быспакка үлэлэһэн кэллилэр. Сыл ахсын үчүгэй үөрэнээччигэ, учууталга анал стипендия олохтообуттарын сыл ахсын туттараллар.
Арассыыйаҕа Норуоттар сомоҕолоһууларын, Саха сиригэр култуура сылларынан, С. П. Алексеева-Боһуут аата Чаппанда орто оскуолатыгар иҥэриллибитэ 20 сылынан муус устар 25 күнугэр, Саха Өрөспүүбүлүкэтин күнүн көрсө, М.С. Семенов аатынан “Дьоҕур “ норуот айымньытын дьиэтигэр оскуола-саад үлэһиттэрин күүстэринэн «Сайдыы суолунан» олус интэриэһинэй, киэҥ бырагыраамалаах кэнсиэр үрдүк таһымнаахтык буолан ааста.
Кэнсиэр саҕаланыыта алгыстаах алаадьынан кэлбит көрөөччүлэри күндүлээтилэр, үбүлүөйдээх үлэһиттэригэр эҕэрдэ суруктары туттардылар, хас биирдии оскуолаҕа, уһуйааҥҥа үлэлээн ааспыт бэтэрээн үлэһиттэригэр, барыларыгар сибэкки дьөрбөтүн туттардылар.
Кэнсиэркэ оскуола кэлэктиибэ бүттүүн турунан көхтөөхтүк кытыннылар. Бииртэн биир кэрэ нүөмэрдэр, сахалыы, чороонноох, ковбой, тувинскай үҥкүүлэри Оксана Дмитриевна Давыдова бэлэмнээн туруорда, бэйэлэрин соло ырыаларын бэлэхтээтилэр Мария Додохова, Михаил Захаров, Василий Иванов, Тапталлаана Филиппова, «Хомус» фольклорнай бөлөх, көрдөөх сценкалар, Клара Васильева хоһоонун аахтылар, ыраах Алтайтан кэлэн үлэлии сылдьар учуутал Айна Владимировна Чичканова бэйэтин алтайдыы тылынан “Берегите и цените свой родной язык” диэн ис хоһоонноох хоһоону аахта.
Бииртэн биир сонун нүөмэрдэр араас омук үҥкүүлэрин холбоон туруоруллубут үҥкүү Арассыыйабытыгар Норуот сомоҕолоһуутун көрдөрөр биир уһулуччу нүөмэр буолла.
Кэнсиэр кэнниттэн олохтоохторго сүүйүүлээх лотерея тэрийдилэр. Лотерея түмүгүнэн супер-бириис мультиварканы Наталья Егорова сүүйдэ.
Үчүгэй кэнсиэри көрбүт көрөөччүлэр астынан, бааттаахтар илии тутуурдаах, өттүк харалаах, күүс, энергия ылан дьиэлэригэр астына дуоһуйан тарҕастылар.
Өссө да куруук маннык түмсүүлээхтик, тэтимҥитин ыһыктыбакка үүнүү-сайдыы суолунан баран иһиҥ.
Е. Тимофеева, Чаппанда