Саввинов Фрол Константинович 1995 с. пиэнсийэҕэ тахсан баран кэтэх хаһаайыстыбанан дьарыктанан саҕалаабыта.
Бу ыал эрдэ сүөһүлээхтэр этэ. Онтон 1995 с. Үөһээ Көрдүгэн диэн сири анатан уолунаан икки хаһаайыстыба буолан сайылык туттарга санаммыта. Маалыкайтан 18 биэрэстэ ыраах уонна суола суох буолан, дэриэбинэттэн уунан оттуурга ороскуота бэрт этэ. 2003 с. сайылыкка хотон туттан көһөн онно оттуу-оттуу ынахтарын ыабыттара, ньирэйгэ мэччийэр дал туттубуттара. Сайын 4 сиэннэрин онно сайылаталлара. Оҕолор улаатан баран окко да, ынах ыырга да көмөлөһөр буолбуттара. Сайыны быһа сибиэһэй салгыҥҥа сылдьан, үүт ас аһаан туруктара да бөҕөргүүрэ. Кэлин кытай тыраахтарын булунан тиэхиникэнэн оттуур буолбуттара.
Сиэннэр улаатан кыра дьиэҕэ баппат буолан иккис дьиэ туппуттара. Манна улахан уол Григорий, Малдьаҕартан быраата Ньукулай, күтүөтэ Өлөксөөн буолан туппуттара. Кэлин ити састаабынан гараас, баанньык эмиэ оҥорбуттара. Онон олорорго, үлэлииргэ Фрол Константинович үчүгэй усулуобуйаны тэрийбитэ, сайын аайы ынахтарын илдьэн үрүҥ аһынан сиэннэрэ, оҕолоро тото аһыыллара. Кыһын даҕаны суорат, иэдьэгэй, сүөгэй, арыы дэлэгэй буолара. Бэйэ сыырын кытта оҥостон сииллэрэ, оттон уонна эт, үөрэ, хаан, атын да эт аһылык барыта баар буоллаҕа.
Кэлин сааһыран кыһыҥҥы өттүгэр ынах көрүүтэ кыаллыбат буолан сылгынан барбыттара. Аны массыына атыылаһан, гараж туттан Фрол Константинович кыһын сылгытын сайылыгар көрөр буолбута. Ол 2012 сылтан саҕаламмыта уонна билиҥҥээҥҥэ диэри сылгыларын онно көрө сылдьар.
Сайын хортуоппуйу, атын оҕуруот астарын эмиэ сайылыкка сир таҥастаан олордоллор. Теплицэҕэ помидор, оҕурсуу олордон дэлэгэй сииллэр. Онон сайылык барахсан эргиччи туһалаах. Күһүөрү отону эмиэ сайылык таһыттан булуналлар, тэллэй да баар. Арай хаптаҕас, моонньоҕон, сугун ол диэки үүммэт.
Сиэннэргэ, хос сиэннэргэ анаан былырыын остуол тенниһигэр сарай туппута, онон оҕолор эт-хаан өттүнэн сайдалларыгар өссө биир усулуобуйа баар буолбута.
2008 с. күн батарыайатын атыылаһан уоттаммыппыт. Онон үүппүтүн сүүрдэрбит. Кэлин кыра тэлэбиисэр ылан кыһыннары-сайыннары көрөбүт. Аны суотабай төлөпүөҥҥэ антенна үөдүйбүтүн кэннэ атыылаһан сибээс үчүгэй. Ордук кыһын эһэбит соҕотоҕун кыстыырыгар сибээс хайаан да наада.
Быйыл эмиэ сайылыкпытыгар көһөөрү өгдөҥнүү олоробут. Онно салгын ырааһа, үүнээйи элбэҕэ тыынарга олус үчүгэй. Оннооҕор сайын Маалыкайга кэллэххэ салгына олох атын. Дьоннор куоракка хайдах олороллорун сөҕө саныыбын. Онно саатар ааҥҥын аһан таһырдьа тахсарыҥ моһуок. Тыаҕа буоллаҕына ааҥҥын астыҥ да айылҕа сибиэһэй салгынынан көрсөрө ураты үчүгэй.
Сайылыкка сайын сарсыардаттан чыычаахтар, атын да көтөрдөр саҥалара, кэҕэ этэрэ бэйэтэ туспа муусука буолан дууһаҕын үөрдэр.
Сайылык барахсан үүтэ-этэ эрэ буолбатах. Бу үлэ өрөгөйө, сибиэһэй салгына, эт-хаан чэбдигириитэ, дууһа ырааһырыыта эргиччи туһалаах буоллаҕа.
Вера Соловьева, Маалыкай