Балаҕан ыйын 8-10 кк. Ньурба улууһун олохтоохторо СӨ Ил Дарханын, Ил Түмэн уонна улуус Сүбэтин дьокутааттарын, итини таһынан Хаҥалас, Чуукаар нэһилиэктэрин олохтоохторо нэһилиэктэрин баһылыктарын талаллар. Бүгүн улууска баар 31 быыбардыыр учаастактар аһылыннылар. Ол иһигэр Накыын вахтовай бөһүөлэгэр быыбардыыр учаастак үлэ эрэһиимин учуоттаан сарсыарда 6 чаастан аһылынна.
Ньурба улууһун территориальнай быыбар хамыыһыйатын бэрэссэдээтэлэ Наталия Петрова иһитиннэрэринэн, улуус үрдүнэн өрөспүүбүлүкэ таһымнаах быыбарга быыбардааччылар испииһэктэригэр — 17383, улуус Сэбиэтин дьокутааттарын быыбарыгар 17496 киһи киллэрилиннэ.
Быыбар учаастагар киирэр дьон металлическай раамканан ааһаллар, полиция үлэһиттэрэ дьуһуурустубалыыллар, кэтээн көрөөччүлэр бааллар. Ньурбатааҕы 403 №-дээх быыбар учаастагын хамыыһыйатын бэрэссэдээтэлэ Юлия Шадрина иһитиннэрбитинэн, быыбардааччылар испииһэктэригэр 650 киһи баарыттан 35 киһи манна олорботунан сибээстээн быыбардааччылар испииһэктэриттэн таһаарыллыбыт уонна манна баар 12 киһи эмиэ сайабылыанньа суруйан испииһэккэ киллэриллибиттэр. Онон билигин быыбардааччылар испииһэктэригэр 627 киһи баар. Быыбар балачча көхтөөхтүк саҕаламмыт.
«Бүгүн учаастакпыт аһыллыаҕыттан 2 чаас иһигэр 47 киһи кэлэн куоластаата. Бүгүн бастакы быыбардааччынан Иванова Марина Алексеевна буолла. Быыбар хаамыытын билиҥҥитэ «Биир ньыгыл Арассыыйа» уонна «Саҥа дьон» баартыйалартан 2 наблюдатель кэлэн кэтээн көрө олороллор».
Геннадий АНТОНОВ.
