Ыам ыйын 30 күнүгэр Чаппанда нэһилиэгэр С. П. Алексеев — Боһуут аатынан орто оскуолаҕа күһүн ыытыллыахтаах “Школа креативной индустрии” аныгы кэм сатабылларын туһунан айан-тутан оҥорон таһаарыы оскуолата бырайыак чэрчитинэн оскуола оҕолоругар, учууталларга, култуура үлэһиттэригэр Аан дойду таһымнаах бэстибээлгэ бэлэмнэнии үлэлэр тула, кэпсэтии ыытылынна.
Манна кыттыыны ыллылар: биир дойдулаахпыт АГУИККИ ректора Игнатьева С.С., Ньурба оройуонун улуус баһылыгын социальнай боппуруостарга салайааччыта Петрова Н.С., Ньурба оройуонун үөрэх управлениетыттан Васильев С.В. , Чаппанда МТ баһылыга Бухолов К.Г, К.Д.Уткин аатынан “Норуоттар доҕордоһуулара” түмэл салайааччыта Туманова А.А., Ньурба оройуонун култуура уонна ыччат бэлиитикэтин департаменын салайааччытын солбуйааччыта Николаева Нь.В., чугас сытар нэһилиэк оскуолаларын дириэктэрдэрэ, “Дьоҕур “норуот айымньытын үлэһиттэрэ.
Кэпсэтии түмүгүнэн санааларын эттилэр. АГУИККИ ректора Игнатьева С.С.:
— Бу бырайыак “Үөрэхтээһин +култуура“ бырайыак 5 сыла буолбута, быыс кэм курдук ааһыахтаах. Үөрэхтээһин систиэмэтигэр саҥа подходтары, аныгы технологиялары олоххо киллэрии буолар. Бу бырайыакпытыгар кыттааччыларбыт бааллар, идеяларбыт кэҥээн иһэллэр , ол курдук ЧИФКиС эмиэ кыттыһабыт диэн биллэрдилэр, ол аата култуурнай-спортивнай бэстибээл диэн буолар буолла.
Манна өссө саахымат оонньууну киллэриэххэ диэн былаанныы сылдьабыт АГАТУ кыттарын өссө да биллэрэ илик. Манна өссө Бурятияттан, Монголияттан уонна ГИТИС кэлэн кыттыыны ылаары сылдьаллар. Онон бырагыраама бэс ыйыгар туруон наада, бэйэҕит идеяҕытынан бырагыраамаҕа этиилэр наадалар, бэс ыйын ортотугар оҥоруохха наада. Креативнай индустрия сайдан турар, экэниэмикэ биир сүрүн өрүтэ буолла. Бу бэстибээл эһиилги оонньууга бэлэмнэнии курдук буолуохтаах.
Ньурба оройуонун улуус баһылыгын социальнай боппуруостарга салайааччыта Петрова Н.С.:
— Аан дойдутааҕы бэстибээл балаҕан ыйыгар буоларын бары билэн олороҕут, бу оҕо бэстибээлэ диэн, улахан дьон бэстибээли тэрийиигэ тэрийээччилэр буолаллар.
Сүрүн соруктары Саргылана Семеновна тириэртэ. Бэстибээл 5 сыллаах үлэ түмүгүн уонна саҥа этапка барар быыс курдук ааһыахтаах. Дириэктэрдэри ыҥырбыт сүрүн сорукпут ханнык оскуола ханнык бырагырааманан кыттарын эрдэттэн былаанныы сылдьаргыт наадалаах. Бырагыраама сүрүн атаҕа бэс ыйын ортотугар туруон наада, онон оскуола дириэктэрдэрэ бэйэҕит идеяларгытын толкуйдаан бырагыраамаҕа киирэригэр этиилэргит наадалар.
Креативнай индустрия сайдан турар, экэниэмикэ биир сүрүн өрүтэ буолан бүттэ. Ол иһин креативнай индустрияҕа тирэҕирдэхпитинэ, култуура, ускуустуба, технология, урбаан эйгэтин сайдыыта барыта, бэйэбитигэр тиийимтиэ, өйдөнөр буоллахтарына, сайдыыга тиийиэхпит.
АГАТУ- ну бэйэбитигэр тардыахпытын наада. Биһиэхэ элбэх агро-оскуолардаахпыт. Аспыт-үөлбүт барыта эһиилги оонньууга бэлэмнэнии курдук буолуохтаах. Бары күүспүтүн түмэн, сөбүлэһэн туруннахпытына кыаллыаҕа дии саныыбын. Онон күһүн ыытыллар үөрэх управлениетын мунньаҕар бу бэстибээл туһунан бырагыраамаҕа киллэрэн хос-хос тиэмэни ыспат курдук холбуу мунньах ыытыахха наада.
Чаппанда МТ баһылыга Бухолов К.Г.:
— Биһиги бу бэстибээл ыытыллар сирдэрин маннык былааннаан олоробут: 1.Оскуола базатыгар. 2. Спорт заалга. 3.Кулуупка.
Оскуолабыт базата ас-үөл өртүгэр, спортзаалга спортивнай тэрээһиннэри, кулуупка култуурнай тэрээһиннэри тэрийиэхпит.
Тэрээһиннэри тэрийиибитигэр саамай ыалдьыттары көрсүүттэн саҕалаан, таҥнарбытыттан, тутта-хапта сылдьарбытыттан саҕаланар. Онон онно үчүгэй бэлэмнээх буоларбыт ирдэнэр.
Ньурба оройуонун үөрэх управлениетыттан Васильев С.В.:
— Барыта идеяттан саҕаланар. Балаҕан ыйдааҕы мунньахпытыгар кэпсэтиэхпит. Биһиги өйбүт- санаабыт биир, баҕар дириэктэрдэр туспа этиилээхтэрэ буолуо. Онон бэйэҕит этиилэргитин толкуйдаан этиэхтэрэ диэн этэбит. Петр Петровичка этиилээхпин, кинилэр “Мүчүк “театральнай бэстибээл тэрийбиттэрэ хас да сыл буолла, онон маны сэргии истибит буолуохтаах, быйыл региональнай ыытыллыбыта, 3 N-дээх оскуола, Антоновка оскуолата эмиэ креативнай хайысхалаах, араас аһылыктары оҥороллор, тех. лицей эмиэ туспа элбэх хайысхаларынан үлэлиир, 2 N-дээх, Сүлэ агрооскуола араас үүнээйилэри, мастары үүннэрэллэр. Өссө да атын оскуолалар эмиэ бааллар, онон бары көхтөөх кыттыыны ылыахтара.
Уткин аатынан “Норуоттар доҕордоһуулара” түмэл салайааччыта Туманова А.А.:
— Биһиги түмэлбит хамаандата бу соторутааҕыта Бурятияҕа Улан-Удэ куоракка “Музейный Дальний“ баран кыттан кэллибит. Манна Дальнай Восток 7 регионуттан кытта кэлбиттэр. Биһиэхэ үчүгэй баай историялаах түмэллэр бааллар, олортон биирдэстэрэ Убайаан оскуолатын иһинэн үлэлиир спорт түмэлэ буолар. Бу түмэлгэ элбэх сэдэх матырыйаал баар, ону эмиэ бэстибээлгэ да, Спортивнай оонньууларга элбэхтик туттуохха наада. Уонна Хатыы нэһилиэгэр эмиэ үчүгэй түмэллэр бааллар.
Ити курдук күһүн буолар бэстибээлгэ бэлэмнэнии үлэтэ саҕаланан бара турар. Бары биир сомоҕо буолан түмүстэхпитинэ туох барыта кыаллыа.
Тимофеева Е.С, Чаппанда