Бүгүн, ахсынньы 29 к., салайааччылар планеркаларыгар РФ Соцстрах фондатын Саха сиринээҕи салаатын Ньурбатааҕы клиентскэй сулууспатын салайааччыта Владимир Моисеев «Баһаары сэрэт — АДПИ-ны туруор!» аахсыйа эстафетатын бэлиэтин улуустааҕы киин балыыһа кылаабынай бырааһа Артем Ксенофонтовка туттарда.
«Соцстрах фондатын Ньурбатааҕы тэрилтэтин үлэһиттэрэ 5 дьиэ кэргэҥҥэ буруоттан тыаһаан сэрэтэр тэрили туруордубут, — диир Владимир Моисеев. — «АДПИ» атыыга Ньурба маҕаһыыннарыгар бүтэн хаалбыт буолан, ыаллыы Сунтаар улууһуттан ыллардыбыт. Онон Ньурбаҕа туһааннаах тэрилтэлэр атыыга анаан хайаан даҕаны аҕалыахтарын наада эбит».
Өрөспүүбүлүкэҕэ «Баһаары сэрэт — АДПИ-ны туруор» социальнай аахсыйа 2021 сылтан олоххо киллэриллэр. Бу чэрчитинэн элбэх оҕолоох дьиэ кэргэттэргэ, соҕотоҕун олорор дьоҥҥо уонна социальнай өттүнэн нэһилиэнньэ атын даҕаны уйан араҥатыгар буруоттан тыаһаан сэрэтэр автономнай тэриллэри туруораллар.
Геннадий АНТОНОВ.