Муус устар 8 к. Ньурбаҕа волонтердар, кэргэннии Светлана Владимировна уонна Владислав Алексеевич Диодоровтар-Лаврентьевтар, «Аҕа дойдуну көмүскээччилэр» судаарыстыбаннай пуонда СӨ-гэр филиалын ыстаарсай социальнай координатора Надежда Степановна Иннокентьева кэлэн үлэлии сылдьаллар.
СВО-ҕа өлбүт буойуттар аҕаларын өрөспүүбүлүкэтээҕи уопсастыбаннай тэрилтэтин бэрэссэдээтэлэ, волонтер Владислав Диодоров-Лаврентьев Олоҥхо дьиэтигэр СВО-ҕа өлбүт буойуттар аҕаларын кытта көрүстэ. Көрсүһүүгэ 10-тан тахса киһи, ол иһигэр улуус баһылыгын социальнай боппуруостарга солбуйааччыта Наталия Петрова, Ньурба к. баһылыга Геннадий Игнатьев, «Аҕа дойдуну көмүскээччилэр» судаарыстыбаннай пуонда Ньурба улууһугар исписэлииһэ Иван Николаев уо.д.а. кытыннылар.
СӨ үтүөлээх артыыһа, алгысчыт Илья Николаев сэриигэ сылдьар уолаттарбыт этэҥҥэ эргиллэн кэлэллэрин туһугар үрдүкү айыыларга алгыһын тиэрдэн, аал уокка айах тутан, арчылаан сахалыы сиэри-туому ситэрдэ. Кэпсэтии аһаҕастык уонна истиҥник барда, элбэх киһи санаатын атастаста. Көрсүһүү түмүгэр Ньурба улууһугар СВО-ҕа өлбүт буойуттар аҕаларын түмсүүтэ тэрилиннэ. Бэрэссэдээтэлинэн биир санаанан Егор Николаевич Тогонохов талылынна.
Владислав Диодоров-Лаврентьев: «Бүгүн биһиги Ньурба улууһугар кэлэн олоробут. Бэҕэһээ Сунтаарга сылдьыбыппыт. СВО-ҕа сүтүктээх аҕалар хамсааһыннарын тэрийэ сылдьабыт.
Биһиги уопсастыбаннай тэрилтэбит 2025 с. ахсынньы 25 к. Дьокуускайга «Аҕа дойдуну көмүскээччилэр» судаарыстыбаннай пуонда СӨ-гэр филиалын кытта мунньахтаан баран тэриллибитэ. Онно миигин бэрэссэдээтэлинэн талбыттара. Бүгүн сэттис улууска тэрилиннэ. Сарсын Үөһээ Бүлүүгэ барыахтаахпыт. СВО-ҕа сүтүктээх аҕалар бэйэ-бэйэлэригэр бүгэн хаалбакка, дьоҥҥо-сэргэҕэ тахсан улуус, куорат тэрээһиннэригэр кыттыһан, бэйэлэрин сүтэрбэккэ, олох суолун устун тэҥҥэ баран иһэллэригэр уопсай хайысханы биэрэбит.
Аҕаларга кытаанах доруобуйаны, мэлдьи иннин диэки баран иһэрбитигэр баҕарабын».
Геннадий АНТОНОВ