Бэҕэһээ “Кыталык” КД саҥа үлэлии кэлбит медиктэр Гиппократ андаҕарын биэрдилэр. Быйыл Ньурбатааҕы киин балыыһаҕа барыта үөрэхтэрин бүтэрбит 18 эдэр исписэлиис үлэлии кэллэ. Кинилэр кэккэлэригэр хирург, анестезиолог, терапевт быраастар, фельдшердэр, сиэстэрэлэр бааллар.
Тэрээһиҥҥэ медицинэ эйгэтигэр өр сыл үлэлээбит бэтэрээн быраастары чиэстээтилэр. Иван Ушканов, Маргарита Герасимова, Прокопий Тихонов 18 эдэр үлэһиттэргэ сүбэ-ама биэрдилэр
Идэҕитин убаастааҥ, чиэһинэй, эйэҕэс буолуҥ, быраас аатын чиэстээхтик илдьэ сылдьыҥ
диэн эттилэр. Бэйэлэрэ үлэлэрин хайдах саҕалаабыттарын ахтан-санаан аастылар.
Тэрээһиҥҥэ Ньурба улууһун баһылыгын солбуйааччыта Наталия Петрова, Ньурба куорат баһылыгын солбуйааччыта Изамира Семенова, Ыччат дьыалаларын уонна имидж политикатын управлениетын исписэлииһэ Юлиана Иванова кыттыыны ыллылар.
Ньурбатааҕы киин балыыһа кылаабынай бырааһа Артем Ксенофонтов 10 быраас уонна 8 орто медицинскэй персонал үлэлии кэлбитин иһитиннэрдэ. Кини эдэр үлэһиттэригэр саамай сүрүнэ ыарыһахха болҕомтолоох буолуҥ, хас биирдии киһини эмтииргитигэр чугас киһигитин эмтиир курдук сыһыаннаһыҥ диэн бэлиэтээн эттэ.
Эдэр испэсэлиис үлэлии кэллэҕинэ хамнаһын акылаатын бастакы 3 сылга үрдэппиттэрин, медик ыал кэлэр түгэнигэр олорор дьиэлэрин куортамын төлүүллэрин туһунан иһитиннэрдэ. Маны таһынан улуус дьаһалтатыгар медицинэ эйгэтигэр улахан болҕомто ууралларын иһин баһылык Алексей Михайловичка махталын биллэрдэ. Ол курдук, тыа сиригэр үлэлии барар түгэннэригэр эбии улуустан 1 мөл.солк. көрүллэрин, ол эбэтэр «Земскэй быраас» программаны кытары холбуу 3 мөл.солк. көрүллэр буолбутун иһитиннэрдэ.
Беатриса Алексеева, 1 учаастак терапевт-бырааһа:
— Бэйэм Кэбээйиттэн төрүттээхпин, бу күһүҥҥэттэн Ньурбатааҕы поликлиникаҕа терапевт бырааһынан үлэбин саҕалаатым. Кэлэктиибим олус эйэлээх, уопуттаах быраастар наар сүбэлии-амалыы сылдьаллар. Кэргэним Ньурбаттан төрүттээх, эмиэ терапевт-быраас. Оҕобут уһуйааҥҥа сылдьар, дьиэбит куортама төлөнөр, инньэ гынан үлэбитин олус сөбүлээн сылдьабыт.
Ньурбатааҕы киин балыыһаҕа билигин каадырынан хааччыллыыта 76.6 % тиийэн турар. Өссө даҕаны анал идэлээх быраастары көрдөөһүн, улууска аҕалааһын үлэтэ тохтообот.
Лена Петрова