Бүгүн, бэс ыйын 20 күнүгэр, Кыталыктаах кырдалыгар уһулуччулаах судаарыстыбаннай, бэлэтиичэскэй диэйэтэл, Саха аптаныамыйатын бөҕөргөтүспүт Степан Васильевич Васильев төрөөбүтэ 130 сылыгар аналлаах «Сомоҕо күүс. Талба талаан. Үрдүккэ дабайыы» Алгыс ыһыаҕа ыһылынна.
«Уран Уус» түһүлгэҕэ «Улуу убайбыт алгыстаах аартыгынан» диэн К.Д. Уткин аатынан Норуоттар доҕордоһууларын, В.А. Петрова аатынан кыраайы үөрэтэр уонна С.В. Васильев аатынан Маалыкайдааҕы кыраайы үөрэтэр түмэллэр пуондаларыттан быыстапка турда.
Быыстапкаҕа үбүлүөйдээх судаарыстыбаннай, бэлэтиичэскэй диэйэтэллэр С.В. Васильев, Н.С. Варфоломеев уонна В.А. Петрова олохторо, үлэлэрэ сырдатылынна, тус маллара көрдөрүүгэ турдулар.
Сарсын, бэс ыйын 21 күнүгэр, быыстапка эмиэ үлэлиэҕэ. Кэлиҥ, сылдьыҥ, ыалдьыттааҥ! Ону тэҥэ түһүлгэҕэ сэргэх остуол оонньуулара эһигини күүтэллэр.
Ньурба түмэлин пресс-сулууспата