Бэс ыйын 12 күнүгэр, Арассыыйа күнүгэр сөп түбэһиннэрэн Бүлүү бөлөх оройуоннарын төрөппүт көрүүтэ суох хаалбыт оҕолору иитэр дьиэ кэргэн региональнай патриотическай слёта буолла.
Бу сылын аайы ыытыллар тэрээһини быйыл Ньурбатааҕы эппиэкэ уонна попечительство салаата иилээн-саҕалаан ыытта. Регистрация быһыытынан барыта 200-чэкэ киһи кыттыыны ылла. Өрүү да буоларыныы бырааһынньыктааҕы тэрээһин өрө көтөҕүллүүлээх таһымҥа буолла.
Региональнай диэн эрээри, бүгүҥҥү күҥҥэ Бүлүү бөлөх оройуоннарын таһынан Дьокуускайтан, Хаҥаластан, Чурапчыттан, Горнайтан, Намтан Саха өрөспүүбүлүкэтин иитэр дьиэ кэргэн ассоцияциятын бэрэстэбиитэллэрэ кэлэн ыалдьыт буоллулар. Онон республиканскай хабааннаах тэрээһин буолла диэтэххэ алҕас буолбат.
Саҕаланыытыгар кыттааччылар оройуоннарынан араас таҥастаах, Арассыыйа күнэ буоларын бэлиэтээн үс өҥнөөх саарыктардаах, Арассыыйа былаахтаах парадтаан киирбиттэрэ ураты көстүү буолла.
Эппэкииннэр, оҕолор илиинэн араас оҥоһуктарын быыстапката туран мустубуттар болҕомтолорун тарта. Дьон дьикти талааннаах үлэлэрин көрбүттэр сэҥээрдилэр.
Ити кэннэ көрөр саалаҕа тэрээһин үөрүүлээх чааһын улуус баһылыгын солбуйааччыта Наталья Петрова аста. Эҕэрдэ тыллар этилиннилэр, өр кэмҥэ үтүө суобастаахтык эппиэкэ үлэһиттэрин кытта тэҥинэн үлэлэһэр иитээччилэргэ оройуон, Саха Өрөспүүбүлүкэтин Үлэҕэ уонна социальнай сайдыыга министиэристибэтин аатыттан махтал суруктары туттардылар.
Салгыы Ньурба оройуона киэн туттар дьоруойа Андрей Григорьев — Тутаны кытта көрсүһүүгэ оҕолор элбэх ыйытыгы биэрэн бэрт сэргэх кэпсэтии буолла.
Ити кэннэ оройуон эппэкииннэрин күүһүнэн бэлэмнэммит хотойорунан астаах остуолларга олорон эбиэттээтилэр. Бу кэмҥэ эҕэрдэ кэнсиэр буолан үҥкүүлээн да ыллылар.
Оҕолор аһыыр сирдэригэр аныгы сиэринэн аниматордар араас аралдьытар оонньуулары тэрийэн оҕолор үөрүүлэрэ үксээтэ. Онтон оҕолор спортивнай-патриотическай «Зарница» оонньуу күрэҕэр пааркаҕа бардылар.
Түмүгэр: Үөһээ Бүлүү — I, Ньурба-1 — II, Бүлүү — III, Ньурба-2 хамаандата IV миэстэлэргэ тиксэн кыайыылаахтар мэтээллэринэн, грамоталарынан наҕараадаланнылар.
Итини тэҥинэн административнай дьиэ аактабай саалатыгар «Сылаас илиигэ бигэнэн» эппэкииннэр ахтыыларынан, Хатыытааҕы приёмнай дьиэ кэргэн — Ирина Ивановна Васильева иилээн таһаартарбыт кинигэтин сүрэхтэниитэ буолла.
Маны сэргэ атын оройуоннартан кэлбит ыалдьыттардыын санаа атастаһан аһаҕас кэпсэтиигэ кытыннылар. Бары биир кыһалҕалаах, биир буоһаҕа сылдьар дьон буолан кэпсэтии олус истиҥ, ис дууһаттан буолан хайа да өттүттэн долгуйааһыннаах, кыратык харах уулаах буолла. Сорох сахалыы сэмэйдик уора-көстө кистии сылдьыбыт ыйытыктары, санаалары этинэн холкутуйдулар.
Кэлии дьон биһиги оройуоммут эппэкииннэрэ уонна эппиэкэ үлэһиттэрэ биир ситимнээхтик, ыкса үлэлиир эбиккит диэн тоһоҕолоон бэлиэтээтилэр, ордугургуулларын биллэрдилэр.
Кэпсэтии уутугар-хаарыгар киирэн уһуо да эбит эрээри түмүктүүр күрэх бириэмэтэ ыган кэллэ. Улахан бырааһынньыгы түмүктүүр тэрээһин түөрт элбэх оҕолоох иитэр дьиэ кэргэттэр «Крепкая семья — сильная Россия» түөрт тыҥааһыннаах түһүмэхтээх күрэхтэрэ буолла.
Үлэ уонна социальнай сайдыы министиэристибэтин анал бирииһин Күннэй, Аркадий Григорьевтарга (Ньурба) туттарда, олохтоох эппиэкэ 10000 солк. сертификат «Эн күнүҥ» сынньалаҥ киинигэр биэрдэ. Ону таһынан кинилэри Үөдэй нэһилиэгин баһылыга Мария Пудовна эҕэрдэлээтэ уонна бэйэтин сэмэй бэлэҕин туттарда.
Түмүккэ: Үөһээ Бүлүү Саввиновтар — III, Ньурба Григорьевтар — II, Үөһээ Бүлүү Лебёдкиннар — I уонна муҥутуур кыайыылаах Бүлүү оройуонуттан Корниловтар дьиэ кэргэн буоллулар.
Эһиилги слёт Сунтаарга буолуо диэн көһө сылдьар слёт бэлиэтэ буолбут чороону Сунтаардарга туттардылар.
Ити курдук ыраахтан-чугастан мустан тоҕуоруһан бэркэ бырааһынньыктаатылар.
Тэрээһин сабыллыытыгар «Магия вкуса» тэрилтэ бэлэхтээбит туордун уотунан уһуурдубутунан көлөһөлөөх остуолга соһон килэрэн уос-тиис үллэстэн сиэтилэр. Оҕолор да, улахан дьон да барарга тиэтэйбэт курдук онон-манан төбүрүөннээн кэпсэтэн аа-дьуо тарҕастылар.
Надежда Казакова, Ньурба