Арассыыйаҕа Дьиэ кэргэн, Саха сиригэр Оҕо саас сылыгар уонна Ийэлэр күннэригэр анаан алтынньы 24 күнүгэр Малдьаҕар нэһилиэгин Никииппэр Сэмиэнэп аатынан норуот айымньытын киинигэр «Төрүккүн билиэҥ-төлкөҕүн түстүөҥ!» диэн ааттаан дьиэ кэргэн төрүччүтүн билиигэ күрэх буолла.
Бу күрэхпит сыалынан-соругунан төрүччүгэ болҕомтону ууран, өбүгэлэри үөрэтэн төрүччүнү салҕааһын, өбүгэ үгэстэрин уонна ытыктабыллаах биир дойдулаахтарбытын үйэтитии, төрүт дьарыктары тилиннэрии. Ону таба туһанан, оҕону сөпкө хайысхалаан, бэйэтин киһи быһыытынан сыана быһарыгар, чөл куттаах, тирэхтээх буоларыгар олук ууруу буолар.
Күрэххэ барыта биэс дьиэ кэргэн олус кыһаллан, бэлэмнэнэн кэлбиттэрэ олус үөртэ, көрөөччү интэриэһин көбүттэ. Хас биирдии оҕо, ийэ, эбээ төрүччүтүн, аймахтарын туһунан билээри элбэх чинчийии үлэтин ыыппыттара өтө көстөр. Кыттааччылар төрүччүлэрин араас таблицаннан, уруһуйунан, фанераны кыһан оҥорбуттарын көрдөрө-көрдөрө уонча көлүөнэҕэ тиийэ өбүгэлэрин туһунан кэпсээтилэр. Эбэлэрин-эһэлэрин төрөппүттэрэ кимнээҕин, хантан төрүттээхтэрин, туох дьарыктаахтарын, дойдуларыгар туох үтүөлээх дьонноохторун, киминэн киэн тутталларын сиһилии кэпсээтилэр.
Биллэн турар, ини-бии Донскойдар түмэллэрин төрүттээччи Татьяна Афанасьевна архыыптан булан оҥортообут матырыйааллара кыттааччыларга улахан тирэх буолла. Дьүүллүүр сүбэҕэ олорбут оҕо уһуйаанын гигиенаҕа инструктора Иванова Т.В., нач.кылаас учуутала, ини-бии Донскойдар ааттарынан оскуола түмэлин үлэһитэ Филиппова Л.В. уонна саха тылын учуутала Саввинова С.Н быһаарыыларынан түмүккэ, Ирина Александровна уолунаан Воронцов Дималыын уонна эбэлэрэ Маргарита Софроновна Степановалыын «Кылаан Чыпчаал» үрдүк аатын ыланнар, Татьяна Афанасьевна Саввинова анал бирииһинэн наҕараадаланнылар.
Атын кыттааччылар тус-туһунан анал аат кыайыылаахтарынан буоллулар. Ол курдук, «Түгэх өбүгэлэрин билэр Дьиэ кэргэн» — Любовь Михайловна, Виолетта Семеновалар; «Удьуор утумнаах дьиэ кэргэн» — Нюргуяна Николаевна, Сардана Поповалар; «Удьуор үлэһит дьиэ кэргэн» — Елена Сергеевна, Василена Филипповалар; «Баай историялаах Дьиэ кэргэн» — Айгуль Афанасьевна, Уйгулаана Павловна, Чэмэлиинэ Филипповалалар уонна «Чуораанчык» уһуйаан, оскуола, кулууп, музей үлэһиттэрэ туруорбут бириистэринэн наҕараадаланнылар.
Бу күрэххэ кыттыбыт дьиэ кэргэттэргэ, бириис туруорбут спонсордарга улахан махталбытын тиэрдэбит, дьиэ кэргэҥҥитигэр мэлдьи ил-эйэ эҥээрдэстин, уйгу-быйаҥ олохтоннун, куруук дьол-соргу эрэ тосхойдун!
Елена Иванова