Атырдьах ыйын 15 күнүгэр СӨ тыатын хаһаайыстыбатын миниистирэ Артем Александров уонна СӨ сирдэрин мелиорациятын управлениетын салайааччыта Дмитрий Дмитриевич Махаровтыын салҕыы Ньурба улууһугар үлэлээтилэр.
Ньурба улууһун тыа хаһаайыстыбатын департаменын салайааччыта Леонид Владимирович Ушканов уонна Ньурба улууһугар мелиорация управлениетын салайааччыта Алексей Борисович Васильев буолан Дьаархан, Акана, Маар нэһилиэктэригэр сырыттылар.
Дьаархан нэһилиэгэр федеральнай трасса ойоҕоһугар «Суптурҕан» диэн сиргэ отчуттары кытары көрсөн от үлэтин хаамыытын билистилэр. Нэһилиэк баһылыга Станислав Святославович Конощук, тыа хаһаайытыбатын специалиһа уонна землеустроитель буолан көрүстүлэр. Дьаархан нэһилиэгэр турар ПСХ «Дьулуур» үүт оҥорор заводугар тиийэн салайааччы Светлана Борисовна Андреевалыын көрсөн кэпсэттилэр. Светлана Борисовна үлэлии турар собуоттара туруга мөлтөҕүн, саҥа дьиэҕэ наадыйарын туһунан эттэ, инники былааннарын үллэһиннэ.
Акана нэһилиэгэр тиийэн үлэ салҕанна. Нэһилиэк баһылыга Ефрем Михайлович Семенов көрсөн мелиорация шлюзтарын көрдөрдө. Дьүҥкүүдэ эбэҕэ буор быһыт сытарын быйылгыттан «Сифон» диэн пластмассовай турба түһэрбиттэрин көрдөрдө. Артем Александрович, Дмитрий Дмитриевич аһары диэн сэргээтилэр. Эһиил мелиорация былааныгар киллэрэн эбии маннык «Сифон» турарын толкуйдуохпут диэн быһаарыныы ылылыннылар.
Киэһээ Маар нэһилиэгэр олохтоох актыыбы кытары көрүһүү буолла. Маар нэһилиэгэ быйыл оттуур сирдэрэ ууга баран Ньурба улууһун иһигэр мөлтөх көрдөрүүлээх. Билиҥҥи күн туругунан ууга барбатах ходуһалар оттонон бүтэн эрэллэр, эбиитин атын нэһилиэктэргэ тиийэн от үлэтэ бара турар. Маар сиригэр оттуур сир таһаарыытын тула кэпсэтии буолла. Олохтоохтор үүт, төбө харчытын туһунан ыйыппыт боппуоруостарыгар хоруй ыллылар. Нэһилиэнньэ санаата бөҕөх: «Кыстыыр оппутун эбии оттоон да, атыылаһан да буолуохпут» диэн эрэх-турах санаалаах олороллоро үөртэ.
Көрсүһүү кэннэ Егор Егорович Иванов хаһаайыстыбатын көрдүлэр. Хотонугар ноһуому таһаарар саҥа техника ылыммытын көрдөрдө, үлэтин-хамнаһын туһунан үллэһиннэ, Сахабыт сиригэр тыа хаһаайыстыбата сайдарын туһугар санааларын миниистиргэ иһитиннэрдэ.
Тыа хаһаайыстыбатын сайдыыта — нус-хас олохпут төрдө. Тыа хаһаайыстыбатын киэн туттуута — ынах-сүөһү ииттэр сахабыт дьоно-сэргэтэ.
Ньурба улууһун дьаһалтатын пресс-сулууспата