? Алтыннььы 11 күнүгэр, Ньурбатааҕы Судаарыстыбаннай тыйаатыр киэҥ уораҕайыгар, ытык киһибит, СӨ норуодунай артыыһа Борис Иванович Борисов өрөгөйдөөх үбүлүөйүн бэлиэтээтибит, маанылаах бэлэхпитин, СӨ норуодунай маастара Афанасьев Ариан Васильевич — Арыйаан Уус алгыстаах Сата тааһын болгуотуттан чочуйбут үйэлээх харысхалы үрдүк сыанаҕа кэтэртибит, Ньурбатааҕы оҕо ускуустуба оскуолатын кэлэктиибэ Василий Кылбанов ойуулаабыт портретын бэлэх уунна.
Өссө төгүл Ытыктабыллаах Борис Иванович Борисовы, Орто дойду оһуордаах олоҕор 75 хаары санныгар уулларбыт үтүө-мааны өрөгөйдөөх күҥҥүнэн уонна айар үлэ аартыгар үктэммитиҥ 50 сылынан Ньурба оройуонун култууратын ситимин бары үлэһиттэрин уонна Ньурба оройуонун Култуураҕа департаменын салайааччыта Р.М.Тихонова аатыттан итиитик-истиҥник эҕэрдэлиибит!
Эн айымньылаах олоҕуҥ усталаах туоратын тыйаатыр үрдүк ускуустубатыгар анаан, үгүс-элбэх үйэ-саас умнуллубат ураты уобарастары айан, арыйан кэллиҥ. Үлэҕэ ураты сыһыаҥҥын, төрөөбүт тылга, сиэргэ-туомҥа, норуот айымньытыгар кыһамньыгын көрөн киэн туттабыт! Оройуон, өрөспүүбүлүкэ социальнай олоҕор сүҥкэн үлэни оҥороргун биһиги дириҥник сыаналыыбыт уонна ис сүрэхпититтэн махтанабыт!
Инникитин даҕаны өрүү маннык дьоллоох, доруобай олохтоох буол! Өссө да элбэх кэрэхсэбиллээх оруоллары арыйан, норуот таптала хаһан да уостубатын!
Ньурба култуурата