Үгэс буоларын курдук, Улуу Кыайыы бырааһынньыгын көрсө, улуус, Ньурба к. уонна нэһилиэктэр салайааччылара, бэрэстэбиитэллээх уорганнар дьокутааттара тыыл бэтэрээннэрин уонна сэрии огдооболорун дьиэлэригэр сылдьан эҕэрдэлээтилэр. Истиҥ тыллардаах эҕэрдэ суруктары уонна олохтоох оҥорон таһарааччылар спонсордардаабыт астарын нобуорун туттардылар.
Ыам ыйын 7 к. улуус баһылыгын бастакы солбуйааччыта Василий Семеновы, Ньурба куорат баһылыгын солбуйааччыта Изамира Семенованы уонна куорат Сэбиэтин дьокутаата Айталина Бускарованы кытта барсан, Ньурбаҕа олорор 4 тыыл бэтэрээнигэр сырыттыбыт.
Тыа хаһаайыстыбатын бочуоттаах үлэһитэ, Ньурбачаан нэһилиэгин бочуоттаах олохтооҕо, 96 саастаах Николай Васильевич Иванов Комсомольскай уул. баар уопсай дьиэҕэ кыыһа Любовь Николаевнаны кытта олорор. Дьиэлээхтэр ыалдьыттарга бырааһынньыктыы остуолу бэлэмнээн олус истиҥник көрүстүлэр. Мантан инньэ өссө да дьоҥҥо сылдьардаах буолан, ыалдьытымсах ыалга наһаа уһаабатыбыт эрээри, сиэр быһыытынан син уһун истиҥ кэпсэтии таҕыста.
Николай Васильевич 37 сыл Ньурбачааҥҥа сылгыһытынан үлэлээбит. Чэм курдук, кыанан сылдьар. Василий Николаевичтыын анал байыаннай дьайыыга тиийэ ону-маны элбэҕи сэргэхтик кэпсэттэ. Кини метрикатын кэлин булбуттарынан, дьиҥнээх сааһа 98 эбит. Онон дьонноро докумуонугар уларытыы киллэртэрээри сылдьаллар.
Эмиэ мантан чугас уопсай дьиэҕэ тыыл бэтэрээнэ Мартынова Анна Ивановна олорор. Кыыһа күннэтэ кэлэн көрөр-истэр, социальнай үлэһит эмиэ кэлэн көрөр эбит. Анна Ивановна Чаппандаттан төрүттээх, оҕо уһуйааныгар, сопхуоска, нэһилиэк Сэбиэтигэр үлэлээбит. Кини улуус дьаһалтатыгар уһуннук үлэлээбит Андрей Иванович Мартынов бииргэ төрөөбүт эдьиийэ буолар.
Энергетик кыбаарталга Өҥөлдьөттөн төрүттээх Татьяна Афанасьевна Григорьева дьиэтигэр эмиэ бэйэтэ олорор, күннэтэ уоллаах кийиитэ кэлэ сылдьан көрөллөр. Татьяна Афанасьевна Марха орто оскуолатыгар Иван Спиридонович Жараевы, Егор Прокопьевич Федоровы-Хорула Дьөгүөрү уонна мин ийэбин Евдокия Ивановна Ильинаны кытта бииргэ үөрэммит. Өймөкөөҥҥө көмүс бириискэтигэр үлэлээн сылдьыбыт. Дойдутугар Ньурбаҕа төннөн «Малышок» кастеляншалаабыт. Бэркэ сэргэхсийэн, үөрэн олоҕун туһунан бэрт элбэҕи кэпсээтэ, барарбытыгар сайыһан подъезка батыһан тахсан атаарда.
Тиһэҕэр салайааччылар эмиэ мантан чугас олорор, Өҥөлдьөттөн төрүттээх тыыл уонна педагогическай үлэ бэтэрээнэ, Учууталлар учууталлара, СӨ бочуоттаах ытык кырдьаҕаһа Анастасия Петровна Егороваҕа тиийэн эҕэрдэлээтилэр. Анастасия Петровна сааһыгар холооно суох эдэрчи уонна сэргэх көрүҥнээх. Уһуннук үөрэх эйгэтигэр үлэлээбит буолан, мунньахтарга кэллиэгэлэрин кытта сылдьан түспүт уопсай хаартыскаларын көрдөрөн, үгүһү-элбэҕи кэпсээтэ.
Улуус дьокутаатттарын Сүбэтин бэрэссэдээтэлэ Нюргуяна Михайлова, улуус баһылыгын социальнай боппуруостарга солбуйааччыта Наталия Петрова уонна Ньурба куорат баһылыга Геннадий Игнатьев В.А.Петрова аатынан Ньурбатааҕы улуустар икки ардыларынааҕы ДИПИ-гэ сырыттылар. ДИПИ олохтоохторугар «Кыталык» КД талба талааннаах үлэһиттэрэ бэртээхэй кэнсиэри бэлэх ууннулар.
ДИПИ-гэ билигин 2 тыыл бэтэрээнэ: Васильева Ирина Ивановна уонна Спиридонова Мотрена Никитична, итиэннэ 7 сэрии оҕото олороллор. Тыыл бэтэрээннэригэр уоттаах сэрии сылларыгар килбиэннээх үлэлэрин уонна Улуу Кыайыыга киллэрбит кылааттарын иһин, үүт аһылык нобуордарын уонна эҕэрдэ суруктары туттардылар.
Салгыы салайааччылар тыыл бэтэрээннэрэ, сэрии оҕолоро — Прокопий Иванович уонна Галина Серафимовна Васильевтарга, Мария Аполлоновна Алексееваҕа тиийэн эҕэрдэлээтилэр, истиҥ махталларын тиэртилэр.
Атын икки бөлөҕү улуус баһылыгын тыа хаһаайыстыбатыгар солбуйааччыта Леонид Ушканов уонна улуус баһылыгын ис бэлиитикэҕэ солбуйааччыта Михаил Пан салайан, тыыл бэтэрээннэрин дьиэлэригэр тиийэн эҕэрдэлээтилэр. Кинилэргэ ис сүрэхтэн тахсар махтал тылларын анаатылар, үтүөнү баҕарыыларын тиэртилэр.
Улуус уонна куорат салалталара аһымал санаа аахсыйатын өйөөбүт олохтоох тэрилтэлэргэ махталларын тиэрдэллэр: СППК «Илгэ» (салайааччылар Семенова Марианна Николаевна, Филиппова Надежда Геннадьевна); СХППК «И.Д.Теленков аатынан Куочай» (Николаев Семен Николаевич); СПССПК «Сиибиктэ Ас» (Иванов Степан Васильевич); СХПК «Маалыкай» (Матвеев Владимир Дмитриевич).
Геннадий АНТОНОВ