Ньурба к. «Кыталык» КД-гар Ньурбатааҕы мелиорация тэрилтэтин 60 сылыгар аналлаах үөрүүлээх мунньахха мелиорация бэтэрээннэрин уонна бастыҥ үлэһиттэрин чиэстээтилэр.
Тэрилтэ туһунан видеоролик көрдөрүлүннэ, мелиорация управлениетын Ньурбатааҕы филиалын дириэктэрэ Алексей Васильев киэҥ ис хоһоонноох дакылаата истилиннэ. Кини саамай ыарахан кэмҥэ туруулаһан үлэлээн тэрилтэни чөллөөх тутан хаалларбыт салайааччылар Егор Кардашевскай, Владимир Белоглазов, Борис Васильев, Тимофей Тоскин уонна Ариан Афанасьев үтүөлэрин үрдүктүк сыаналыырын эттэ. 30-тан тахса сыл ханна даҕаны халбарыйбакка бэриниилээхтик үлэлээн кэлбит Людмила Борисова, Эдуард Монзоев уонна Владимир Чымыров кэлэктииби түмэр төһүү үлэһиттэр буолалларын тоһоҕолоото.
Улуус баһылыга Алексей Иннокентьев куйаар ситиминэн мелиоратордары үбүлүөйүнэн истиҥник эҕэрдэлээтэ. Улуус баһылыгын 1-кы солбуйааччыта Василий Семенов мелиоратордар үлэҕэ дьулуурдарын, наукаҕа олоҕуран киэҥ хайысхалаах үлэни ыыталларын, мелиорация тэрилтэтин кытта улуус тэҥҥэ үлэлэһэрин бэлиэтээн туран, Алексей Васильевка Эҕэрдэ суругу уонна 60 тыһ. солк. сертификаты туттарда.
Тыа хаһаайыстыбатын департаменын салайааччыта-улуус баһылыгын тыа хаһаайыстыбатыгар солбуйааччыта, улуус Сүбэтин дьокутаата Леонид Ушканов өрөспүүбүлүкэ 34 улууһугар Мелиорация управлениетын 7 филиала баарын, онтон биирдэрэ Ньурбаҕа ситиһиилээхтик үлэлии олорорун, элбэх сыллаах оту үүннэриигэ уонна аһылык базатын сайыннарыыга күүскэ үлэлэһэрин эттэ, Ил Түмэн дьокутаата Владимир Прокопьев эҕэрдэтин, харчынан сертификаты туттарда.
Тыа хаһаайыстыбатын уонна ас-үөл бэлиитикэтин миниистирин солбуйааччыта Сахаяна Павлова биир дойдулаахпыт миниистир Артем Александров аатыттан эҕэрдэни тиэртэ, өрөспүүбүлүкэ тыатын хаһаайыстыбатын үлэтин сүрүн көрдөрүүлэрин туһунан кэпсээтэ. Ньурбатааҕы мелиорация тэрилтэтэ уонна Ньурбатааҕы кормовой хампаанньа өрөспүүбүлүкэҕэ тарбахха баттанар үлэлээх тэрилтэлэр буолалларын бэлиэтээтэ.
Салгыы Ньурба к. баһылыгын солбуйааччыта Павел Необутов, ТХМ иһинэн Мелиорация управлениетын салайааччыта Дмитрий Махаров, М.Г.Сафронов аатынан Саха сиринээҕи тыа хаһаайыстыбатын научнай-чинчийэр институт кылаабынай научнай үлэһитэ Елена Пестерова, Чаппанда уонна Сүлэ нэһилиэктэрин баһылыктара Краснослав Бухолов уонна Дмитрий Иванов нэһилиэктэрин уонна Октябрьскай нэһилиэк аатыттан эҕэрдэлэрин тиэртилэр, бэлэх-туһах туттардылар.
Тыа хаһаайыстыбатыгар улахан суолталаах мелиорация эйгэтигэр урут ситиһиилээхтик үлэлээн ааспыт уонна билигин үтүө суобастаахтык үлэлии сылдьар үлэһиттэр наҕараадаланнылар: Дмитрий Дмитриевич Махаров — «Ньурба улууһун социальнай-экономическай сайдыытыгар кылаатын иһин» бэлиэ; Виктор Николаевич Ефремов — «Ньурба улууһун тыатын хаһаайыстыбатын бочуоттаах бэтэрээнэ» уонна «СӨ тыатын хаһаайыстыбатын туйгуна»; Ариан Иванович Афанасьев — «СӨ агропромышленнай комплексын бочуоттаах үлэһитэ», Николай Николаевич Семенов – «СӨ тыатын хаһаайыстыбатын туйгуна», Алексей Борисович Васильев, Ольга Степановна Алексеева, Владимир Николаевич Чымыров уонна Эдуард Степанович Монзоев – «СӨ мелиорациятын бэтэрээнэ», Николай Викторович Капустин – «Ньурба к. социальнай-экономическай сайдыытыгар кылаатын иһин» бэлиэ. Элбэх киһи өрөспүүбүлүкэ, биэдэмистибэ уонна улуус таһымнаах атын даҕаны наҕараадаларынан бэлиэтэннилэр.
Тиһэҕэр сыанаҕа Ньурбатааҕы мелиорация бэтэрээннэрин таһааран чиэстээһиннэрэ бу дьоро киэһэ өрөгөйдөөх түгэнинэн буолла. Маннык бэлиэ тэрээһиннэргэ мэлдьи буоларын курдук, култуура үлэһиттэрэ уонна айымньылаах үлэлээх кэлэктиип эҕэрдэ нүөмэрдэринэн сэргэхситэн киэргэттилэр.
Геннадий АНТОНОВ