Дьокуускайдааҕы республиканскай психологическай киин Ньурбатааҕы филиалын социальнай педагога Туяра Михайловна Алексеева психологическай киин үлэтин туһунан куйаар ситимигэр билиһиннэрдэ.
-Психологическай киин анал байыаннай дьайыы саҕаланыаҕыттан дьиэ кэргэннэрин кытары үлэлэһэр.Сорохтор куйаар ситиминэн тахсаннар сүбэ-ама көрдүүллэр, уоппускаҕа кэллэхтэринэ сирэй көрсөн кэпсэтэн көмө оҥоробут.Демобилизацияламмыттар эмиэ көмөҕө наадыйаллар.Биһиги үлэбит сүрүнэ — анал байыаннай дьайыыга сылдьааччылары, кинилэр дьиэ кэргэннэрин кытары үлэлэһии, көмөлөһүү буолар.
Араас маастар кылаастары тэрийэн, ыытан кэллибит.Бу саас харысхаллары оҥорон бэйэбит дьоннорбутунан байыаннай дьайыы байыастарыгар ыыппыппыт.
Ньурбаҕа анал байыаннай дьайыы кыттыылаахтарын кэргэннэрин өйүүр сыалтан аан бастаан анал бөлөх тэрийбиппит, кэлин группа иһиттэн Плотникова Варвара Георгиевна салайааччынан ананан, уопсай сүбэнэн «Ньурба ньургуһуннара» кулууп диэн ааттанан үлэлэрин саҕалаан дьоҥҥо-сэргэҕэ биллэллэр.
От ыйын 1 күнүгэр, Саха Өрөспүүбүлүкэтигэр Бойобуой дьайыы бэтэрээннэрин күнүгэр бойобуой дьайыы кыттыылаахтарыгар аналлаах постамены арыйыыны «Ньурба ньургуһуннара» кулууп көҕүлээбитэ. Маны таһынан Ньурбаҕа баар дьахталлар түмсүүлэрин кытары тэҥҥэ үлэлэһэбит.
2023-2024 сс. сайын анал байыаннай дьайыы кыттыылаахтарын оҕолоругар анаан сайыҥҥы сынньалаҥ «СМАрт» кулууп үлэлэттибит. Кулууп үлэтигэр оҕолору кытары дьиэ кэргэннэр араас хабааннаах тэрээһиннэргэ олус көхтөөхтүк кытыннылар.
Улууска ыытыллар тэрээһиннэргэ, ол иһигэр доруобуйаларынан айгыраабыт дьоҥҥо психологическай көмө оҥоробут.
Маны сэргэ аҕам саастаахтар декадаларыгар соҕотоҕун олорор аҕам саастаах дьоннорго «Ньурба ньургуһуннара» оҥорбут бакыаттаах бородууктанан көмөлөспүттэрэ.Ити курдук хабааннаах үлэлэр бараллар, — диэн Туяра Михайловна кылгастык билиһиннэрдэ.
Антонина Семенова