Ыһыах түһүлгэлэригэр хаһан баҕарар ат сүүрдүүтэ уонна хапсаҕай элбэх көрөөччүнү түмэр. Кэккэ сылларга төрүт многоборье биир оннук.
Бу көрүҥ күүскэ сайдан анал тылбаас да баар буолбута, оскуолаларга да киллэриэх курдуктар. Саха дэгит күрэһэ итинник инники күөҥҥэ тахсыытыгар Дыгын оонньуулара улахан сабыдыаллааҕын спорду сэҥээрээччилэр бэлиэтиир буолуохтаахтар.
Онуоха Дыгын оонньууларын тэҥэ түһүлгэлэр эр дьоҥҥо, ыччакка эрэ буолбакка, улуус, нэһилиэктэр ыһыахтарыгар оҕолорго, үүнэр көлүөнэҕэ эмиэ тэриллэллэр. Холобур, былырыыҥҥы улуус ыһыаҕар Дьиикимдэ нэһилиэгэ ыыппыт «Оҕо Боотур» многоборье күрэҕин санаан ааһыаҕыҥ. 2014-2016 с.т. Ньурба улууһуттан, Сунтаартан, Дьааҥыттан 19 уол күөн көрсүбүттэрэ: бэйэни билсиһиннэрии, хапсаҕай, мас тардыһыы, үс төгүл үс, 100 м. сүүрүү, 15 кг. куул көтөҕүү. Оҕолор дьулуурдара, төрөппүттэр, учууталлар кыһаллыылара, көрөөччүлэр көхтөрө сүрдээх. Күрэҕи киин түһүлгэҕэ тэрийиэххэ сөбүн туһунан үгүс дьон кэпсэтэрэ. Оҕолор буһан-хатан улахан түһүлгэлэргэ дьэ тахсыахтара турдаҕа.
Ол тахсыылара чугаһаабыт боотурдар аҕыйах хонуктааҕыта Ньурбачаан ыһыаҕар күрэхтэстилэр. Урбаанньыт Дмитрий Григорьев салайааччылаах Ньурба улууһун саха дэгит күрэһин федерацията 2008-2010 с.т. уолаттарга таһымнаах, сэргэх тэрээһини ыыттылар. Абытайдаах тыҥааһыннаах киирсиилэр аастылар: үс төгүл үс, тутум эргиир, мас тардыһыы, 400 м. сүүрүү, хапсаҕай.
Лицейтэн кыайыылаах Айсен Евсеев матасыыкыл тутта, иккис буолбут эмиэ лицей үөрэнээччитэ Иван Бессонов 25 тыһ., үһүс миэстэлээх гимназияттан Емельян Иванов 15 тыһ. наҕараадаланнылар. 24 кыттааччы лицей, гимназия, Ньурбачаан, Антоновка, Хорула, Марха, Күндээдэ, Маалыкай, Дьаархан, Ньурба 2 № оскуолаларын үөрэнээччилэрэ. Ити икки күрэххэ кыттааччы ахсаана элбэҕи этэр.
Эдэр уолаттар өттүлэриттэн төрүт көрүҥнэргэ сэҥээрии дьоһун бириистэртэн эрэ буолбакка, бэйэлэрин ис кыахтарыттан, саха омугар ытыктабылтан эмиэ тахсара саарбаҕа суох. Улууска саха дэгит күрэһэр сэргэх сыһыан үөскүүрүгэр Владимир Федоров, Николай Обоев, Валентин Афанасьев сабыдыаллара эмиэ баар бөҕө буоллаҕа.
Аны улуус ыһыаҕар эр дьоҥҥо «Ньурба боотура» күрэх буолаары турар. Көхтөөх көрөөччү ахсааныгар киирэҥҥит улууска саха дэгит күрэһин таһымын сыаналааҥ, чаҕылхай түгэннэри илэ хараххытынан көрүҥ. Уонна эһиги быыскытыгар улахан түһүлгэҕэ тахсалларын көһүтэр эдэр боотурдар хайаан да баар буолуохтара.
Айталина КАМИЛОВА