Бу күннэргэ Алдаҥҥа Олимпийскай резервэ училищетын базатыгар хайыһарга СӨ чөмпүйэнээтэ уонна биирдиилээн бастыыр иһин күрэхтэһиитэ буола турар.
Бу Саха сиригэр хайыһар успуорда тэриллибитэ 100 сылыгар аналлаах улахан тэрээһиҥҥэ өрөспүүбүлүкэ күүстээх хайыһардьыттара кытталлар. Алданнааҕы Олимпийскай резервэ училищетын тренерэ Петр Осипов үөрүүлээх сонуну иһитиннэрдэ.
«Ньурба улууһун историятыгар хайыһарга өрөспүүбүлүкэҕэ биирдиилээн бастыыр иһин күрэхтэһиигэ аан маҥнай эстафетаҕа улахан ситиһилэнннибит: Алдан улууһун кэнниттэн 2-с миэстэҕэ таҕыстыбыт! – диир Петр Аркадьевич. – Биһиги кэннибититтэн Мэҥэ Хаҥалас улууһун хамаандата үһүс буолла.
Эстафетаҕа 2008-2009 сс. т. оҕолорго Алданнааҕы Олимпийскай резервэ училищетын иитиллээччилэрэ Самир Колесов (Антоновка, 9 кыл.), Ксения Яндреева (Ньурба, 10 кыл.), итиэннэ Ньурбатааҕы техлицей 9 кыл. үөрэнээччитэ Алик Алексеев, Ст. Васильев аатынан Ньурбатааҕы элбэх хайысхалаах гимназия 9 кыл. үөрэнээччитэ Марина Петрова сүүрдүлэр.
СӨ биирдиилээн бастыыр күрэхтэһиитигэр «Снежный снайпер» биатлоҥҥа 2016 с.т. оҕолорго Антоновка 2 «а» кылааһын үөрэнээччитэ Сааскылаана Осипова 2-с миэстэҕэ таҕыста.
СӨ биирдиилээн бастыыр иһин күрэхтэһиитигэр Самир Колесов 10 км хайыһарга «коньковай истиилгэ» 3-с миэстэ буолла.
Уопсай түмүккэ улууспут хамаандата 5-с буолла. «Спортивные якутяне» СӨ үөрэнээччилэрин Спартакиадатыгар 7-с миэстэни ыллыбыт. Бу күрэхтэһиилэргэ 5 үрүҥ көмүс уонна 1 боруонса мэтээллэри ыллыбыт.
Ньурба улууһугар быйыл хайыһар 100 сылыгар анаан Октябрьскай, Бордоҥ уонна Чуукаар нэһилиэктэрэ хайыһар күрэхтэһиитин тэрийбиттэрэ. Ол түмүгүнэн сүүмэрдэммит оҕолорбут өрөспүүбүлүкэ күрэхтэһиитигэр ситиһиилээхтик кытыннылар.
Манна, бастатан туран, оҕолорбут төрөппүттэригэр махталым улахан. Кинилэр бары улаханнык кыһаллан, оҕолорун Алдан куоракка ыытан маннык ситиһии кэллэ.
Хатыыттан: Васильева Мичийээнэ, Васильева Мичийэ, Николаев Эрсан, Семенов Анатолий (9-с кылаастар), Николаев Гриша 7 (кыл.), тренердэрэ — Данилов Данил Алексеевич;
Ньурба куораттан: Алданнааҕы Олимпийскай резервэ училищетын иитиллээччилэрэ Яндреева Ксения (Ньурба 2 №-дээх орто оскуолата, 10 кыл.), Аргунов Даниил (Ньурбатааҕы элбэх хайысхалаах гимназия, 8 кыл.), итиэннэ Алексеев Алик (Ньурбатааҕы техлицей, 9 кыл.);
Антоновкаттан: Алданнааҕы Олимпийскай резервэ училищетын иитиллээччитэ Самир Колесов (Антоновка орто оскуолата, 9 кыл.), Петрова Марина (Ньурбатааҕы элбэх хайысхалаах гимназия, 9 кыл.), Афанасьев Сахаян (Антоновка орто оскуолата, 6 кыл.), Федоров Алексей (техлицей, 7 кыл.), Антоновка 4-с уонна 2-с кылааһын оҕолоро Осипова Сайыына уонна Осипова Сааскылаана.
Улуус хамаандатын бэрэстэбиитэлэ, хайыһар успуордун бэтэрээнэ Никифорова Пелагея Владимировнаны кытта мин оҕолору илдьэ сырыттыбыт.
Күүс-көмө буолбут дьоммутугар: улуустааҕы үөрэх салалтатын салайааччыта Федор Федорович Ушкановка, Мэҥэдьэк нэһилиэгин баһылыга Леонид Александрович Николаевка, улуус Сүбэтин дьокутааттарыгар, «Пегас» автошкола хаһаайына Михаил Александрович Тимофеевка улахан махталбытын тиэрдэбит.
Антоновка балыыһатын үлэһиттэрин эмиэ истиҥ тылларынан бэлиэтиэхпин баҕарабын. Сылын аайы кинилэртэн уонна ДЮСШ бырааһыттан көҥүллүүр докумуон ылан күрэхтэһэ тиийэбит. Быраас Никифорова Мария Владимировнаҕа уонна медсестра Мохначевская Мираида Михайловнаҕа эмиэ истиҥник махтанабыт»!
Геннадий АНТОНОВ