Бу ыйга улууспут дэлэгээссийэтэ 11-с төгүлүн Анал байыаннай дьайыы зонатыгар айанныаҕа. Дойдубутун көмүскүү сылдьар уолаттарбытыгар гуманитарнай көмөнү тиэрдиэхтэрэ. Ньурба к. уонна бары нэһилиэктэр олохтоохторо бу күннэргэ кинилэргэ ас-таҥас, мал-сал бэлэмнээн Дьокуускайга ыыттылар.
«Уолаттарбыт ыраах сылдьан дойдуларын аһылыгын ахталлар, күүтэллэр, — диир улуус баһылыгын социальнай боппуруостарга солбуйааччыта Наталия Петрова. — Бэрэски, кэтилиэт, ис үөрэтэ, күөх луук, өрүс балыгын, барыанньаны, ыыһаммыт эти, тоҥ эти, олохтоох халбаһыны уо.д.а. хомуйан ыыттыбыт. Билигин Украинаҕа лаппа сылыйда, онон тоҥ баһыылканы биирдиилээн дьонтон туппатыбыт.
«КөмүсКэл» волонтерскай иис сыаҕа, мэлдьи буоларын курдук, элбэх наадалаах малы-салы бэлэмнээн ыытта. Каска аннынан кэтиллэр подшлемниктары, анал көстүүмнэри, маскировкалыыр сиэккэлэри, лежактары уо.д.а. Биһиэхэ сырыы ахсын Игорь Николаев «Алыптаах маас» диэни оҥорон бэлэмнээн биэрэр, уолаттар итини билэллэр, сөбүлээн туһаналлар. Биллиилээх эмчит, алгысчыт Алиса Иннокентьева уолаттарга харысхалларын бэлэмнээн ыытта. Оскуолалартан, нэһилиэктэртэн харысхаллар, чүмэчилэр, оҕолор саллааттарга суруктара барда. Дойдуларын көмөтө уолаттарбытыгар Улуу Кыайыы 81 сылын көрсө тиийиэҕэ.
Ол эрээри көмө аҥардас аһынан-таҥаһынан эрэ муҥурдаммат. Улуустааҕы суһал ыстаап бу күннэргэ уолаттар сайаапкаларынан оборудованиелары, туттар тэриллэри атыылаһыыга үлэлии олорор. Дроннары билэн сэрэтэр «Булат-4» ылаттаатыбыт.
СВО зонатыгар биһиги сэриилэрбитигэр сибээс отой мөлтөөн турарын, «Старлинк» сибээһэ биһиги өттүбүтүгэр үлэлээбэтин истэбит-билэбит. Ол иһин саҥа «Газпром» диэн спутниковай сибээс тэриэлкэтин боруобалаан көрүөхпүтүн баҕарабыт. Итиэннэ «Тут» радиостанциялары ылаттыахпыт. Уолаттар камикадзе-дроннары утары туттуллар элбэх доруоп саа ботуруонун, «Мавик» беспилотниктары үлэһэллэр. Элбэх уолга тиийэрин курдук саа ботуруоннарын ылаттыахпыт. Портативнай радиостанциялары сырыы аайы илдьэбит, бу сырыыга эмиэ илдьэ барыахтара.
Нэһилиэктэртэн Бордоҥ дьаһалтата үчүгэйдик үлэлэһэ сылдьарын бэлиэтиибин. Нэһилиэк баһылыга П.Ю.Степанов 2 уолаттарын сакааһынан «Мавик»-тары илдьэн туттарыаҕа.
Билигин улуустааҕы СВО фондатын хаҥатыы күүскэ барыахтаах. Буойуттарбыт сакаастарын туолуута фондаҕа төһө үп киирэриттэн быһаччы тутулуктаах. Ити эппитим таһынан, «Нива» массыынаҕа, матассыыкылга сайаапкалаах уолаттар бааллар. Дойдубутун көмүскэһэн инники кирбиигэ сэриилэһэ сылдьар уолаттарбыт тыыннарын, олохторун өрүһүлтэтэ кинилэр наадалаах тиэхиньикэнэн, оборудованиенан хааччыллыылара буолар. Барыта олус сыаналааҕын, аны сэриигэ алдьанарын, үлтүрүтүллэрин, онон саҥаттан саҥа ылыллыан наадатын билэбит, өйдүүбүт. Ол иһин бу күннэргэ СВО фондата төһө үп киирэриттэн ити сайаапкалары толорорбут улахан тутулуктаах.
Анал байыаннай дьайыыга диэн биһиги уолаттарбыт элбэх киһи өлүүлээх уонна алдьатыылаах сэриигэ кытта сылдьалларын өйдөөн туран, дьон-сэргэ оҕотуттан кырдьаҕаһыгар диэри СВО фондатын хаҥатыыга өйдөрүн-санааларын ууран туран көмө буолуохтара диэн баҕа санаалаах үлэлии сылдьабыт.
Дьокуускайга баар улууспут бэрэстэбиитэлистибэтэ бу нэдиэлэни быһа биирдиилээн тус баһыылкалары хомуйар. Кыһын эрдэ ыыппыт эппит, арыыбыт морозильника сытарын холбоон, баһыылка оҥорон бу күннэргэ авиа-хампаанньалары уонна «Донбаһы өйүүр пуонданы» кытта кэпсэтэн, таһаҕаспыт Москваҕа тиийэрин хааччыйарга үлэлэһэр».
Геннадий АНТОНОВ