Ахсынньы 19 күнүгэр дойдубут Президенэ Владимир Путин үгэскэ кубулуйбут сыл түмүктэрин таһаарар Аан дойду суруналыыстара кыттыылаах улахан пресс-конференцията буолла.
Барыта 600 суруналыыс (ол иһигэр 100-чэ телеоператор) аккредитацияны ааһан анаммыт күҥҥэ тоҕуоруһа муһунна. Быйыл Саха сириттэн 4 суруналыыс ахсааныгар киирсэн улахан тэрээһиҥҥэ кыттар чиэскэ тигистим. “Саха” НКИХ-тан Ирина Ефимова, Олег Колесов, “Вести” ГТРК-тан Анна Ярыгина уонна “Ньурба” хаһыаттан мин. Хас биирдии суруналыыска бу тэрээһиҥҥэ кыттар улахан чиэс, үлэҥ сыанабыла буолар.
Аны туран, Саха сиригэр сүүмэрдээһини ааспытыҥ кэннэ, Кремль пресс-сулууспата бигэргэтиэн наада, инньэ гынан, көтүөхпүт икки эрэ күн иннинэ барар буоларбытын билбиппит. Онно тиийэн баран араас үгээргэ анаалыс туттардыбыт, кыра үгээр сибикитэ баар буоллаҕына киллэрбэттэр. Аккредитацияны аастыбыт, хас биирдиибитигэр өйдөбүнньүк бэлэх туттардылар ноутбук суумката, халандаар, уруучука, сурунар планшет уонна анал бейдж. Ону тэрээһин бүтүөр диэри сүтэрбэккэ кэтэ сылдьарыҥ ирдэнэр.
Сарсыныгар киэһэ хойут анаалыстарбыт түмүктэрэ кэллилэр, инньэ гынан пресс-конференция буолуон иннинээҕи киэһэ чопчу киирэрбит биллибитэ. Уһун айаны айаннаан кэлэн баран киирбэтэх суруналыыстар да бааллара.
Ааҕааччылар пресс-конференция хайдах барбытын көрбүт буолуохтааххыт, онон күөх экраҥҥа көстүбэт түгэннэригэр тохтуом.
Сарсыарда 8 ч уочараттаан, хас даҕаны улахан бэрэбиэркэни ааһан, “Гостиный двор” диэн ааттанар сиргэ киирдибит. Туспа саалаҕа фуршет тэрийбиттэр, дьиэни уларытан хос иһигэр хос курдугу оҥорбуттар. Оруобуна күнүс 12 ч Президеммит Владимир Владимирович кэлэн, саала иһэ биирдэ сэргэхсийэ түстэ. 4,5 чаас устата 103 ыйытыыга хоруйдаата. Барыта 3 мөлүйүөн ыйытыы араас ситим нөҥүө киирбит, биэриини 7 мөлүйүөн кэриҥэ киһи көрбүт. Манна тустаах үлэһиттэр сыл устата хоруйдары бэлэмнээн ыытыахтара диэн эттилэр.
Суруналыыстар араастык бэлэмнэнэн, оҥостон кэлэллэр эбит. Национальнай көстүүмнэрин кэтэн, араас симэхтэрин иилинэн. Кокошниктаах, гирляндалаах хас даҕаны кыыс баар этэ. Президент болҕомтотун тардаары табличкаларыгар араас суруктары суруммуттар “Хочу замуж”, “Хочу жениться”, араас ойуулар, үгүстэригэр дойдуларын, тэрилтэлэрин аатын суруйбуттар. Онтубут ирдэбил быһыытынан А4 кээмэйиттэн улахана суох буолуохтаах.
Маннык ньыма эмиэ үлэлиирин “Ыччуу” диэн суруктан көрбүккүт буолуо. Инньэ гынан Саха сириттэн икки ыйытыы хоруйданна. Уһук Илин регионуттан сахаларгэ эрэ иккитэ тыл биэрдилэр диэн тэрээһин кэннэ атын суруналыыстар ымсыырбыттарын аһаҕастык этэллэр этэ.
Конференция түмүгүнэн Владимир Путин быһаччы өйөбүлүнэн Ньурбалар биир дойдулаахпыт Андрей Григорьев – Тута олоҕун, хорсун быһыытын туһунан киинэ уһуллуо, дойду үрдүнэн киэҥ прокакка тахсыа, Саха сирин Арктикатыгар тариф үрдээһинин, тахсар саахал өттүгэр бэрэбиэркэ ыытыллыа. Биллэн турар, дойдубутугар кыһалҕа элбэх, манан тустаах тэрилтэлэр дьарыктаналлар.
16:30 ч барыта бүппүтүн да кэннэ тарҕаһан барбатахпыт. Киэһэ 18 ч диэри атын куораттартан, регионнартан кэлбит биир идэлээхтэрбитин кытта билсэн, ирэ-хоро кэпсэтэн, уопут атастаһан тарҕаспыппыт. Маннык улахан тэрээһиҥҥэ сылдьан элбэҕи биллэхпит, инникитин үлэбитигэр туһаныахпыт.
Бу сыл үлэлээбит үлэм сыаналанан, дойду үрдүнэн талыллыбыт суруналыыстар кэккэлэригэр киирэн умнуллубат үтүө сырыыны бэлэхтээбит тэрилтэбэр “Сахабэчээккэ” улаханнык махтанабын.
Лена ПЕТРОВА