Ньурбабыт улууһугар ыытыллар IX Спортивнай оонньууларга улуус дьоно-сэргэтэ бүттүүн кыттыһан, тэрээһин, ыалдьыттары көрсүү боппуруостарыгар күүстээх үлэ ыытыллар.
Онтон Ньурбабыт улууһун спортсменнарыгар бэйэлэрин дойдуларыгар ыытыллар күрэххэ кыттыы икки бүк эппиэтинэстээх буолар. Бу оонньууларга путевка ылан, кыттыыны ылар спортсменнарбытын билиһиннэрэр рубрикабыт маҥнайгы ыалдьытынан, улууска маҥнайгы путевканы аҕалбыт Ньурбабыт улууһун волейболга эр дьоҥҥо сүүмэрдэммит хамаандатын капитана, тренерэ Вячеслав Афанасьев буолар.
— Вячеслав, Ньурбабыт улууһугар ыытыллар Спортивнай оонньууларга маҥнайгы путевканы волейболга эр дьон хамаандата ылары ситиспиккитинэн эҕэрдэлиибит. Бэйэҥ тускунан сырдатыаҥ дуо?
— Махталларыҥ. Мин бэйэм Ньурба куоратыттан төрүттээхпин, Ньурбатааҕы 2 №-дээх орто оскуоланы бүтэрбитим, онтон Хотугулуу-Илиҥҥи федеральнай университет физическэй култуура уонна спорт институтун бүтэрэммин, идэбинэн үлэлии-хамсыы сылдьабын. Билигин кэргэннээхпин уонна бу ааспыт кэрэ аҥардар күннэригэр, чемпионат ыытыллар кэмигэр, биһиги дьиэ кэргэҥҥэ эбиллии буолбута, кырачааммыт күн сирин көрбүтэ.
— Волейбол көрүҥэр хаһааҥҥыттан дьарыктанаҕын?
— Волейбол көрүҥэр мин олус уустуктардаах кэлбитим. Оскуолаҕа үөрэнэр кэммэр Ньурбаҕа баар спортивнай секцияларга барытыгар холонон көрбүтүм. Устудьуоннуу кэлэн баран волейбол көрүҥүн интэриэһиргээн, умсугуйан туран күүскэ дьарыктанан саҕалаабытым. Волейбол көрүҥэр дьарыктаммытым уопсайа 8 сыл буолла.
— Бу билиҥҥи састаап, улуус сүүмэрдэммит хамаандата хайдах түмүллэн үлэлээн саҕалаабытын туһунан сырдатыаҥ дуо?
— Ньурбаҕа сүүмэрдэммит хамаанда бу көрүҥҥэ суоҕунан сибээстээн, атын улууска легионерынан сылдьыбытым. Онтон дьон саҥатын истэн, кыһыйан, бэйэм биирдиилээн уолаттары көрүтэлээн, талан хамаанда мунньар эбиппит диэн санааҕа тиийбитим. Улуустааҕы спорт управление, улуустааҕы волейбол федерациятын кытта үлэлэһэн, Макаров Олегы кытары, хамаанда хомуллубута. Сүрүн састаап Хатыы нэһилиэгин, оҕо сааһым доҕотторо буолаллар.
— Сбордар, бэлэмнэнии чааһа уонна бу састаап хамаанданан ситиһиилэргит.
— Сбору Дьокуускай куоракка ааспыппыт. Бэйэм туспа тренер-капитан буоларым быһыытынан бырагыраамам миэнэ чыҥха атын, сыалбыт-сорукпут дьарыгы олох тохтотуо суохтаахпыт диэн бастыҥ сыаллаахпыт. Киһи этэ-хаана улахан ноҕуруускаҕа үөрэнэн түргэнник ону аһарынарга, чөлгө түһэриини табаммыт дьарыктана сылдьабыт.
Улахан ситиһиилэрбитинэн: «КУБОК ФЕДЕРАЦИИ» 2 лига — 1 миэстэ, «Кубок Вилюя» 3 миэстэ буолуубут. Уонна биллэн турар бу көрүҥҥэ, бэйэбит төрөөбүт Ньурбабыт сиригэр-уотугар, бары да олус күүтэр Спортивнай оонньууларбытыгар путевка ылыыбыт буолар.
— Инники былааҥҥыт, Ньурбаҕа ыытыллар оонньуулартан тугу күүтэҕит, ханнык күүстээх хамаандалары бэлиэтээн этэҕин?
— Инники өттүгэр тас ыытыллар күрэхтэһиилэргэ бара сылдьар былааннаахпыт, өссө да элбэх үлэ күүтэр. Хамаанда түмсүбүтэ биир эрэ сыл буолла, онон өссө да элбэх дьаныардаах дьарык уонна күрэхтэр күүтэллэр. Саҥардыы састаап буолан, бары да олус көхтөөхтүк хайа баҕар күрэххэ кыттарга бэлэммит. Ньурбабытыгар ыытыллар оонньууларга күүтэрбит диэн, дьоммутун-сэргэбитин үөрдүөхпүт, Ньурбабыт улууһа тустууннан, боксанан муҥурдаммакка маассабай спорт биир саамай үгүс дьону түмэ тардар волейбол көрүҥэр эмиэ баарбытын дакаастыахпыт диэн эрэнэ күүтэбит.
Путевка ылбыт хамаандалар бары да күүстээхтэр дии саныыбын. Хамаандалар бары күүскэ дьарыктанан бэлэмнэнии хаамыыта тэтимнээх. Биһиги Ньурбабыт улууһун хамаандата 2027 сылга өссө ситэн-буһан үчүгэй тыҥааһыннаах оонньуулары көрдөрүөхпүт диэн бигэ эрэллээхпит.
Бу курдук, өрө көтөҕүүлээх, волейбол көрүҥүн улууска саҥалыы тыыннаабыт хамаандабыт капитан-тренерэ Вячеслав Афанасьев санаатын иһиттибит.
Салгыы кэлэр хаһыат нүөмэрдэригэр биирдиилээн спортсменнарбыт туһунан сырдатыылары ааҕыҥ-сэргээҥ!
Ньурбатааҕы спорт управление пресс-киинэ