👨🏿🤝👨🏽Ааспыт үөрэх дьылыгар А.Н.Чусовской аатынан Ньурбатааҕы техническэй лиссиэй «Искра» байыаннай-патриотическай кулууп алтынньы ыйга өрөспүүбүлүкэтээҕи «Защитник Отечества» байыаннай-спортивнай күрэххэ кыттан, биирдиилээн көрүҥҥэ автомат ыһыытыгар, хомуйуутугар -III-c, строевой бэлэмнэниигэ – II — c, уопсай спортивнай көрүҥҥэ — II -c миэстэлэнэн, уопсай түмүккэ — V-с миэстэни ылбыттарын туһунан Ньурбатааҕы техническэй лиссиэй үрдүк категориялаах учуутала, «Искра» БПК салайааччыта Попов Игорь Михайлович кэпсэтиитин саҕалаата.
👨👧-«Искра» байыанай патриотическай кулуупка уолуттан, кыыһыттан тутулуга суох 7-11 кылаас үөрэнээччилэрэ, спорка сыһыаннаах оҕолор бэйэлэрин баҕа өттүлэринэн сылдьаллар. Оҕо бэйэтин баҕа санаатынан киириэхтээх, чэгиэн доруобуйалаах буолуохтаах. Сүрүннээн нэдиэлэҕэ иккитэ дьарыктанабыт, күрэхтэһиилэр кэмнэригэр күн аайы оҕолору дьарыктыыбыт.
Биһиги оҕолорго Ийэ дойдуга бэриниилээх буолууга, партиотическай тыыҥҥа иитиигэ үөрэтэбит. Сүрүн сыалбыт: спортивнай күрэхтэргэ, байыаннай параадка, миитиннэргэ кыттааһын буолар.
Анал эпэрээссийэҕэ сыһыаннаан этэр буоллахха, Ньурбатааҕы техническэй лиссиэй икки үлэһитэ дойдуларын чиэһин көмүскүүллэр. Кинилэр дьиэ кэргэннигэр уонна Ньурба куоратын олохтоохтохторугар күһүн муус ылыытыгар, мас хайытааһыныгар, бэлэмнээһинигэр көмө оҥоробут.
🏃♂️🏃♀️Ааспыт сылга оройуоҥҥа ыытыллыбыт «Снежный барс» байыаннай-спортивнай күрэххэ кыттаммыт I миэстэ буолбуппут, 7-с төгүлүн бастаабыппыт. Кулун тутар ыйга Чурапчыга ыытыллыбыт өрөспүүбүлүкэтээҕи күрэххэ кыттаммыт, 16 хамаандаттан VIII миэстэ буолбуппут. Автомат ыһыытыгар уонна строевой хаамыыга — III-с миэстэлэммиппит.
Аҕа дойду сэриитин кэмигэр Ильмень күөлгэ буолбут уоттаах кыргыһыы 80 сылыгар анаммыт тэрээһиҥҥэ Нижней Новгородка баран кэлбиппит. Кыргыһыы хонуутугар бэйэлэрин толук уурбут саха буойуннарыгар аналлаах пааматынььыкка сибэкки дьөрбөтүн уурбуппут, сахалыы алгыс оҥорбуппут, сахалар сэриилэспит сирдэригэр көрсүһүү тэрийбиппит.
Санкт-Петербурга тиийэн норуоттар икки ардыларынааҕы строевой хаамыы күрэҕэр параднай формалаах хааман, I-кы истиэпэннээх лауреат аатын ылбыппыт. Строевой хаамыыга Арассыыйа араас муннуктарыттан уопсайа 80-тан тахса хамаанда кыттыбыта.
Ыам ыйыгар Ньурбаҕа Кыайыы параадыгар кыттыбыппыт. Пеионерия күнүгэр «Факел» байыаннай-спортивнай күрэххэ кыттаммыт бастаабыппыт.
— «Искра» кулуупка сылдьыбыт оҕолордоох төрөппүттэр махатаналлар: «Ньурбатааҕы техническэй лиссиэй «Искра» кулууп салайааччытыгар, үрдүкү категориялаах учууталбытыгар Попов Игорь Михайловичка биһиги дьиэ кэргэн аатыттан махталбытын тиэрдэбин. Игорь Михайлович ыччаттары дойдуларын көмүскүүр патриотическай тыыҥҥа иитиитэ ыччаттар инники олохторун булуналларыгар үтүө холобур буолар, — диэн ийэ Виктория Семеновна махталын биллэрбитэ.
— Махтал. Ньурбатааҕы техническэй лиссиэй выпускнига, младшай сержант Дьулусхан Иванов аармыйаҕа сулууспалыы сылдьан Москубаҕа Кыайыы параадыгар строевой хаамыыга, атырдьах ыйыгар Арассыыйаҕа Муоратааҕы байыаннай флот параадыгар кыттыыта биһиэхэ улахан чиэс буолар. Дьулусхан лиссиэйгэ үөрэнэр кэмигэр Владивосток куоракка күрэхтэһиигэ кыттыбыта, өрөспүүбүлүкэтээҕи күрэххэ бастаабыта. Спортивнай күрэхтэргэ ситиһиилэрдээх, биһиги кинини дэгиттэр талааннаах ыччат быһыытынан билэбит уонна киэн туттабыт.
-Игорь Михайлович, быйылгы үөрэх дьылыгар былааҥҥыт туһунан ааҕааччыга билиһиннэриҥ эрэ.
-Улуустааҕы үөрэҕирии салалтата, спорт управлениета уонна оҕо спортивнай оскуолата үөрэнээччилэргэ анаан спартакиада тэрийэн ыытыахтаах, онон элбэх күрэхтэһиилэр ыытыллыахтара.
Олунньу ыйга байыаннай күрэхтэһиигэ муниципальнай этап буолуохтаах, кулун тутарга өрөспүүбүлүкэтээҕи күрэх ыытыллара былааннанар. Билигин бэлэмнэнии үлэтэ барар. Оҕолорбут оройуоннааҕы ОБЖ, региональнай олимпиадаҕа кыттыахтара.
-Билигин дойдуга уустук балаһыанньанан сибээстээн, ыччаты патриотическай тыыҥҥа иитиигэ аналлаах тэрээһиннэр ыытыллаллара буолуо.
-10 кылааһы бүтэрбит уолаттар биэс хонуктаах байыаннай-хонуу сборугар кытталлар. Базабыт Хаҥалас оскуолатыгар баар, биэс күн лааҕыр курдук тэрийэн ыытабыт. Ааспыт сылга 78 оҕо кыттыыны ылбыта, иллэрээ сыл аахсаан өттүнэн арыый элбэх этилэр. Манна уолаттарга аармыйа олоҕуттан сарсыарда эрдэ турааһынтан саҕалаан, байыаннай-прикладной, строевой, физическэй өттүнэн бэлэмнэнии, ГТО туттарыытын ааһаллар. ПДН, ИДьМ, ЫБМ, Быыһыыр сулууспа структуралартан кэлэннэр бэсиэдэ ыыталлар.
Анал эпэрээссийэҕэ сылдьааччылар бииргэ үлэлиир үлэһиттэрбит алтынньы уонна ахсынньы ыйдарыгар уопускаҕа кэлэ сылдьар кэмнэригэр көрсүһүү тэрийэн ыыппыппыт. Бука бары уодаһыннаах сэрии тохтууругар баҕарабыт.
Үөрэх чааһыгар эбии эттэххэ, ОБЖ предметин аата уларыйан, ОБИЗР (Основа безопасности и защита Родины) диэн ааттанна. 10-11 кылаастарга бу предмети үөрэтэр буоллахпытына, 2024 үөрэх дьылыгар 5-11 кылаастарга пробнай предмет быһыытанан киирдэ. Урукку НВП уруога сөргүтүлүннэ.
Төрөппүттэр дьиҥ кырдьыгы тиэрдэр маассабай-иһитиннэрэр сириэстибэлэри истиэхтэрин, билиэхтэрин наада. Билиҥҥи оҕо, ыччат хамсаналлара, сүүрэллэрэ-көтөллөрө аҕыйаҕынан оҕолору эт-хаан өттүнэн эрчийиигэ үлэ барыан наада.
Ньурба оройуон 4200-тэн тахса оҕолордоох буоламмыт, элбэх ахсааннаах оҕолордоох улууска киирэбит. Оҕобут ахсаана элбэҕинэн куорат оскуолаларын спортивнай күрэхтэргэ, спартакиадаҕа тэҥҥэ күрэхтэһэбит. Төрөппүттэр оҕолорун спортивнай сиэксийэлэргэ сырытыннаран, үлэҕэ сыһыарыахтаахтар.
— Игорь Михайлович, ыччаты патриотическай тыыҥҥа иитиигэ, чэгиэн туруктаах буолалларыгар үлэлииргит махталлаах дьыала. Инникитин үөрэнээччилэргит ситиһиилэри аҕала турдуннар.
Антонина Семенова